Аудан әкімі Бақытжан Жәнібеков Өндіріс ауылдық округінде болып, тұрғындармен тілдесті. Еркін форматта өткен кездесуге ақсақалдар мен ауыл белсенділері қатысып, елді мекенге қатысты мәселелерді көтерді.
Ақсақалдар өңіріміздегі ауылдардың барлығына ортақ мәселе — жайылым мен электр жарығына қатысты түйткілді айтып, оны оңды шешуге атсалысуды сұрады. Сондай-ақ, ауыл ішіне, оның ішінде үй іргесіне ағын су жеткізу мәселесін назарға ұсынса, ауыл жастары күрес пен боксқа арналған шағын спорт зал қажеттілігін жеткізді. Қазіргі кезде жайылым мен электр бағаналарына қатысты мәселелер кезең-кезеңімен шешімін табуда. Ал спорт нысанына қатысты түйткілді алдағы жылдың еншісіне қалдыратыны ескертілді.
Одан бөлек, аталған ауылда “Adelya Milk” маркалы табиғи сүт өнімдерін шығарумен айналысатын “Тлеумаханова С” жеке кәсіпкерлігінің жұмысын көрді. Кәсібін кеңейтуді көздеп отырған кәсіп иесімен сөйлесіп, түйткілді мәселелерін шешу жолы қарастырылды.
