Ағымдағы жылдың 24 қараша күні Тараз қаласындағы Ә.Бөкейханов атындағы №1 гимназияда 8–10 сынып оқушылары арасында құқық бұзушылықтың алдын алу мақсатында «Балалардың құқықтарын қорғау және «Заң мен тәртіпті өзімізден бастайық» тақырыбында іс-шара өткізілді.
Іс-шараның негізгі мақсаты — заңда белгіленген құқықтарды талқылаумен қатар, олардың күнделікті өмірде қолданылуын нақты мысалдар арқылы түсіндіру, сондай-ақ балаларға қауіпсіз және қолайлы орта қалыптастыру жолдарын қарастыру болып табылды.
Шара барысында қатысушыларға Бала құқықтары туралы Конвенция, Қазақстан Республикасының «Баланың құқықтары туралы» Заңы, сондай-ақ балалардың қауіпсіздігі мен әл-ауқатын қамтамасыз етуге бағытталған ұлттық саясат туралы жан-жақты ақпарат ұсынылды.
Оқушыларға өз құқықтарын қорғау тәсілдері, қиын жағдайлар туындағанда қандай органдарға немесе ұйымдарға жүгіну керектігі, буллинг пен кибербуллингтің алдын алу, киберқауіпсіздік, қауіпсіз мінез-құлық ережелері жөнінде түсіндіру жұмыстары жүргізілді.
Іс-шара топтық жұмыс, пікірталас, жобалық тапсырмалар және бейнематериалдар арқылы ұйымдастырылып, оқушылардың белсенді қатысуына мүмкіндік берілді. Шара соңында қатысушылар өз пікірлерімен бөлісіп, сұрақтар қойып, құқықтық білімнің маңыздылығын атап өтті.
Жалпы, іс-шара жоғары деңгейде өтіп, балалардың құқықтық мәдениетін арттыруға және олардың құқықтарын қорғауға қатысты нақты әрекеттерді түсінуіне оң әсерін тигізді.
