Облыс экономикасының барлық салаларында оң динамика қалыптасып отыр. Экономиканың өсуі – 103,8 пайыз. Бұл туралы облыс әкімі Асқар Мырзахметов облыстық мәслихаттың кезектен тыс өткен сессиясында берген есебінде мәлімдеді, – деп хабарлайды «shanyraqinfo.kz» ақпарат агенттігі.
– Өнеркәсіп өндірісінің көлемі 3 пайызға, өңдеу өнеркәсібі 5,4 пайызға өсті. Негізгі капиталға салынған инвестиция 12,7 пайызға артты. Осы орайда бюджеттен тартылған инвестиция азайып, жеке сектордың үлесі көбейіп келе жатқанын айтуға болады. Есепті кезеңде 17 миллиард теңгеге 7 жоба іске қосылды. Жыл соңына дейін 46 миллиард теңгеге 9 жоба іске асырылады. 32,2 миллиард теңгеге бағаланған 2 жоба шетел инвесторларының қатысуымен атқарылады. Олар – «Kaz-ir Agro» ЖШС-нің (Иран) «Сафлор майын шығару зауытын кеңейту» және «M-KATGREEN» (Франция) компаниясының «Күн электр стансасының құрылысы мен пайдалануы» жобалары.
Бөлшек сауда 104,3 пайызды, көтерме сауда 109,8 пайызды құрады.
Инфляция деңгейі (2018 жылдың желтоқсанына) 102,3 пайыз. Бұл республикалық орта көрсеткіштен төмен.
Ауыл шаруашылығының өнімі – 103,8 пайыз, яғни 2 мың гектарға артып, 670 мың гектарға жетті. Егін ору өткен жылдан 60 пайызға жоғары (2018 жылы – 39,5 мың, 2019 жылы – 64,7 мың гектар).
Өткен жылы құрылған мехотряд 99 шақырым каналдарды тазалап (27 канал, 5 су қоймасы), 6,6 мың гектар суармалы жер қалпына келтірілді, – деді аймақ басшысы.
Сондай-ақ, 2018 жылы республика бойынша экспортталған қой етінің 43 пайызы (1,6 мың тонна) облысқа тиесілі болған. Биыл бұл меже көбейтіліп, 6 айдың қорытындысымен 500 тонна ет экспортталды, немесе республиканың 30 пайызын құрап отыр.
Ет экспортының артуына байланысты арпа 27 мың гектарға артық егілді.
Қант өндірісін дамыту үшін тәулігіне 8 мың тонна қант қызылшасын өңдейтін қант зауытының құрылысы тамыз айында басталады («Qyzylsha» ЖШС-мен іске асырады). Жоба Арнайы экономикалық аймақта салынбақ.
Құрылыс көлемі 12,4 пайызға өсіп, 226 мың шаршы метр тұрғын үй пайдалануға беріліп, 6,2 пайызға артты. Оның ішінде 260 пәтер көпбалалы және аз қамсыздандырылған отбасыларына берілді. Бұдан басқа, демеушілер есебінен 24 отбасы тұрғын үймен қамтамасыз етілді.
Баспанаға мұқтаж аз қамтылған және көпбалалы отбасыларын тұрғын-үй кезегі жеткенге дейін жатаханамен қамту үшін 8 жатақхананың құрылысы басталды.
Жеке тұрғын үй құрылысына 2877 жер телімі беріледі. Бұдан бөлек, тек электр қуатын тарта отырып 17 алқапта 3722 жер телімін беру қарастырылуда.
«7-20-25» бағдарламасы аясында 320 адам өтініш беріп, 173-і қолдау тапты. 144 азаматқа 1 миллиард теңгеге несие рәсімделді.
«Нұрлы жер» бағдарламасы аясында 30 көппәтерлі тұрғын үйдің құрылысы жүргізілуде, 28-і жыл соңына дейін тапсырылады Оның 9-ы – арендалық үйлер. 14 инфрақұрылымдық жоба іске асырылуда.
