Тараз қаласы әкімінің орынбасары Нұрсұлтан Исабеков шаһар аумағындағы нысандардың 2025-2026 жылдардағы жылыту маусымына дайындық жұмыстарымен танысты.
Ең әуелі Нұрсұлтан Арқабайұлы «Таразэнергоорталық» АҚ-ның жылу қазандықтарын аралады. Қазіргі таңда мекеме тарапынан белгіленген 20 іс-шараның 18-і толығымен орындалған. Атап айтсақ, №1, 2, 3, 4 бу және № 5, 6, 7 су қыздырғыш қазандарын, сорғыларды ағымдағы жөндеу жұмыстары жүзеге асырылған. Сондай-ақ биыл облыстық бюджет тарапынан ТЭО-4 қазандығының Т-1 трансформаторы ауыстырылған. Бұған қоса Т-2 трансформаторын әзірлеуге қаржы-экономикалық негіздеме әзірленіп, тиісті қаржы бөлініпті.
Акционерлік қоғамда мазут қоры жеткілікті деңгейде екен. Десе де қосымша мазут сатып алу үшін облыстық энергетика және тұрғын үй-коммуналдық шаруашылық басқармасына өтінім берілген. Бүгінде кәсіпорын жылыту маусымына 90 пайызға дайын тұр.
Бұдан кейін қала әкімінің орынбасары «Таразтрансэнерго» мекемесінің газ қазандығын көрді. Аталған кәсіпорын жылу желілері мен қазандық жабдықтарына ағымдағы және күрделі жөндеу жұмыстарын жүргізіп, нәтижесінде жалпы 960 метр жылу құбырының 950 метрге жуық бөлігі ауыстырылған. Кәсіпорын қазандықтарының дайындығы 100 пайызды құрап отыр.
Келесі кезекте Н.Исабеков «Жамбыл-Жылу» МКК-ның АҚ-1 қазандығына аялдады. Аталған кәсіпорын «Қант зауыты» алқабындағы ұзындығы 7,2 шақырымды құрайтын жылу желілерін қайта жаңғырту мақсатында жобалық-сметалық құжаттама әзірлеп, сараптаманың оң қорытындысы алынған. Құны 1,5 миллиард теңгені құрайтын жобаны 2026 жылы «Энергетикалық және коммуналдық секторларды жаңғырту» Ұлттық жобасы аясында қаржыландыру жоспарлануда. Сонымен қатар А.Асқаров көшесі, №277 «Б» мекенжайындағы психикалық денсаулық орталығының, «Қарасу» тұрғын алқабы №29 және №38 үйлердің арасындағы жылу желілерін күрделі жөндеу, №32 орта мектеп қазандығының негізгі қондырғыларын ауыстыру жұмыстары толығымен аяқталған. Кәсіпорында бүгінгі күні 390 тонна мазут қоры бар. Мекеме қысқы кезеңге 97 пайызға әзір.
Содан соң Н.Исабеков «София» ЖШС-нің қазандығымен танысты. Серіктестік өз қаражаты есебінен 40 метр жылу құбырын ауыстырған. Қазандықтың негізгі қондырғыларын ауыстыру, жылу құбырларын қайта гидравликалық сығымдаудан өткізу жұмыстары толығымен аяқталып отыр. Кәсіпорынның жылыту маусымына дайындығы 100 пайызды құрайды.
Сонымен қатар, Нұрсұлтан Арқабайұлы «Т.И.Батуров атындағы Жамбыл ГРЭС» АҚ-ның жылыту маусымына әзірлігін де тексерді. Мекеме бүгінгі таңда №1, 2, 3 бу қазандарын және №1, 2 дренаждық сорғыларды ағымды жөндеу жұмыстарын тәмамдаған. Резервтік мазут қоры да жеткілікті. Кәсіпорынның жылыту маусымына дайындығы 100 пайызды құрайды.
Нұрсұлтан Арқабайұлы жұмыстарды қазан айының басына дейін аяқтап, кәсіпорындар жылыту маусымына сақадай сай болуы керектігін атап өтті.
