Бүгін Талас ауданы Берікқара ауылдық округінде орналасқан ауыл клубында және Қаратау қаласының Балалар өнер мектебінің мәжіліс залында облыстық мәслихаттың депутаты Ескендіров Мұқаш Зұлқарнайұлы және «Nur Otan» партиясының Жамбыл облыстық филиалы төрағасының бірінші орынбасары Бейсенқұлов Дауыл Ынтықбайұлы бастаған облыстық-ақпараттық түсіндіру тобы аудан активімен кездесу өткізді.
Кездесуге «Nur Otan» партиясы Талас аудандық филиалы төрағасының бірінші орынбасары Ғалым Тамабекұлы Қартабаев, аудандық ардагерлер кеңесінің төрағасы Жұмабек Әсемов, жергілікті мемлекеттік орган басшылары және зиялы қауым өкілдері, ауданның құрметті азаматтары, аудан тұрғындары мен жас буын өкілдері қатысты. Жиынды аудандық мәслихат хатшысы Қадірбек Рысқұлбекұлы Садубаев жүргізді. Аталған кездесуде алғаш сөз алған Дауыл Ынтықбайұлы қаңтар айының алғашқы күндері елімізде орын алған жаппай тәртіпсіздіктер салдарынан облысымызда бірқатар ғимараттар қиратылып, қару-жарақтар ұрланды. Оның бәрін қалпына келтіру жұмыстары қарқынды түрде жүргізілуде. Бүгінгі таңда облыстық партия филиалы бұрынғы облыстық сот ғимаратына уақытша қоныстанды. Партия жұмысы кедергісіз жүргізілуде. Ендігі мақсат осындай оқиғалардың алдын алып, жас ұрпаққа өнегелі тәрбие беру, — деді. Одан бөлек, топ мүшесі Мұқаш Зұлқарнайұлы халықтың арасына іріткі салып, берекені қашыруды мақсат еткен азаматтар өкінішке орай бар екенін салмақты оймен жеткізді.– Бүгін аймақта Төтенше жағдай режимі толықтай алынды. Дегенмен қауіптілігі жөнінде әлі де қызыл аймақтамыз. Облыс бойынша қаңтардағы қақтығыста 15 азамат көз жұмып, 2640-тан азамат ұсталды. Қоғамды екіге ажыратуды көздегендердің салдарынан қаншама ғимарат қирады. Бұдан біз сабақ алу керекпіз. Ұрпақ сабақтастығы мен тәрбиесі жолындағы жұмыстарға баса мән беру керекпіз, — деді мәслихат депутаты.
Сондай-ақ тұрғындар тарапынан оқиға байланысты өз ойын білдіргендер болды.
Талас ауданы әкімдігінің баспасөз қызметі
