Екінші дүниежүзілік соғыстың даңқты тұлғасына, аты аңызға айналған әскери қолбасшыға, халық қаһарманына деген шынайы құрметті осылай көрсетуге болар еді.
Қазақтың батыр ұлы ел есінде ойшылдығымен, даналығымен, өнегесімен, бірегей шығармашылығымен қалды. Жазушының екі тілде жазған дүниелері көкейкестілігін ешқашан жоймайды. Шет ел мамандары оның соғыс психологиясы туралы еңбектеріне әлі де қызығушылық танытады. Сондықтан Алматыда әлем танитын жарқын тұлғаның мемориалдық музейі болуға тиіс. Заманауи тарихи-мәдени, әскери-патриоттық тәрбие орталығын ұйымдастыру бүгінгі ұрпақтың парызы деп білеміз.
Мұндай қадам әділеттіліктің негізі — заң мен тәртіпті, бейбіт өмірді, тұрақтылық пен қауіпсіздікті сақтаудың маңызын арттыра түсері сөзсіз.
Сондай-ақ, 28-гвардияшы
панфиловшылар саябағында орналасқан офицерлер үйі мұндағы ескерткіштер кешенін мән-мағыналық жағынан толықтырып, жастардың отаншыл сезіміне қозғау салып, азаматтық көзқарасын қалыптастыруға ықпал етеді.
Нағыз сарбаздар мен сардарлар өнегесі, дәстүрі еліміздің мақтанышына айналуға тиіс деп санаймыз.
Қазақстанның әскер тарихы мен офицерлік мектебі жалғыз кеңестік кезеңмен шектелмейді. Мұны кезінде батыр Бәукең де айтқан. Ал қазіргі формасы мен мазмұны тек соған байланғандай көрінеді.
Б.Момышұлы мұрасында мың жылдық батырлық дәстүріміз, ұлттың тағдыр-талайы, жасампаздығы мен жаңашылдығы — бәрі тұнып тұр. Сол себепті Бауыржан тұлғасы әрі мәдениет, әрі дәстүр. Екеуі үйлесіп, қорғаныс саласының деңгейін көтереді.
Әскер тарихына әділетті көзқарас, ұстаным осылай орнығады.
Дархан МЫҢБАЙ
