Қазақстан президенті Қасым-Жомарт Тоқаев еліміздің ең ірі қаласы әрі оңтүстік астанасы – Алматыны қазақ тілінде қабылданған нұсқасының орнына орыс тілді азаматтар мен шетелдіктердің “Алма-Ата” деп атауында еш әбестік жоқ екенін айтты, деп хабарлайды Stan.kz ақпарат агенттігі.
“Алматы” қазақ тілділер үшін қолайлы. Ал орыс тілділерге келсек, «Алма-Ата» деп айту ыңғайлы. Сондықтан мынаған келісейік, ресми түрде «Алматы» атауы қалады, ал қаланың атын оның тұрғындары мен сырттан келетіндер ыңғайына қарай айта берсін», — деді мемлекет басшысы «Хабар 24″телеарнасына берген сұхбатында.
Айта кетейік, Алматы 1997 жылға дейін Кеңес Одағы құрамындағы Қазақ КСР-інің және тәуелсіз Қазақстанның астанасы болды. Соңғы есеп бойынша қала тұрғындарының саны 2 миллионға жетеді. «Алматы» атауы еліміздің 1993 жылғы Конституциясында бекітілген. 2019 жылдың желтоқсанында жазушы және қоғам қайраткері Олжас Сүлейменов қаланың атын “Алма-Ата” деп өзгертуді ұсынды. Ол бұл ұсынысты президент Тоқаевпен кездесуде талқылағанын айтты. Оның айтуынша, мемлекет басшысы бұл мәселені халықтың өзі шешуі керек екенін атап өткен.
Еске сала кетейік, дәл осы сұхбатында Қасым-Жомарт Тоқаев қай мерзімге дейін президент лауазымында қалатыны туралы сұраққа жауап берген еді.
