Құқық қорғау органдарының мәліметінше, қылмыс «Рахат-лукум» караоке-клубында болған екен. Полицейлер қылмыс жасалған жерге жақын бау-бақшалар мен саяжайларды тексерген. Күдіктілер сол жерде жасырынған көрінеді.
«Қылмыс жасалған жердегі барлық бейнебақылау камерасын қарап шықтық. Соның арқасында қылмыскерлердің қай жаққа кеткенін білдік. Кейін куәгерлердің айтқандары бойынша біз олардың «Көктем» саяжайы аумағында орналасқанын анықтадық. Осыдан кейін жедел топ құрылды. Бүгін сағат 10:30-дың шамасында саяжай аумағында құрықталып, полиция департаментіне жеткізілді. Олар полицейлерді көргенде қашты, бірақ қарсылық көрсеткен жоқ. Тергеу Қылмыстық кодекстің 99-бабы, 2-бөлігі бойынша жүргізіліп жатыр. Онда 20 жылдан бастап өмір бойына бас бостандығынан айыруға дейінгі жаза қарастырылған», — деді Жаншин арнайы брифингте.
Ішкі істер министрінің өзі тергеу шараларын жеке бақылауына алды. Полиция департаменті күдіктілердің марқұм кәсіпкердің қол астында жұмыс істегенін, я істемегенін растамады.
«Ондай ақпарат жоқ. Тергеу кезінде бәрін анықтап, сіздерге хабарлаймыз. Бір қылмыскердің деструктивті ағымға қатысы бар-жоғы да тексеріліп жатыр. Ол қылмыс жасағаннан кейін полицияның көзіне түспеу үшін сақалын қысқартып тастаған», — деп атап өтті Жаншин.
Еске сала кетсек, Еркін Мұханғалиевтің мәйіті П.Атоян атындағы стадионның тұрағынан табылған. Кісі өлтіргеннен кейін күдіктілер 31 жастағы Руслан Қожантаев пен 21 жастағы Тұрлан Амангелді оқиға орнынан қашып кеткен.
Оралдан шығатын және кіретін жолдарды полицейлер тексеріп, қылмыскерлерді ұстауға күш құрылымдары жұмылдырылды.
Сонымен қоса кәсіпкерді өлтірген сәттің видеосы тараған болатын. Кадрден кәсіпкердің екі жігітпен дәмханада сөйлесіп отырғанын көруге болады. Кенеттен жанжал басталып, жігіттердің бірі кәсіпкердің мойын тұсына бірнеше мәрте пышақ сұғып алады. Жарақат алған Еркін Мұханғалиев терезеден шығып үлгереді, бірақ олар оны қуып жетіп, көшеде тағы 15 рет пышақтаған. Кәсіпкер жедел жәрдем келгенше көз жұмды.
https://stan.kz/oraldagi-kasipker-olimi-policiya-kudiktilerdin-kalay-ys-368537/
