Павлодар облысында адам өлімімен аяқталған жол апаты: Жол қызметкерлерінің тасжолды көктайғақтан тазартпағаны белгілі болды
Тергеу жұмыстары Павлодар облысындағы адам өліміне әкеп соқтырған жол-көлік оқиғасына жолдың дұрыс тазартылмағаны себеп болғанын растады.
14 қараша күні сағат 10:40 шамасында Ресей Федерациясы шекарасының 72 шақырымындағы Павлодар – Успен тасжолында ВАЗ-21074 және Volkswagen Passat көліктерінің қатысуымен жол-көлік оқиғасы орын алған. Алған жарақаттардан екі адам оқиға орнында көз жұмса, тағы екеуі түрлі дене ауруларымен ауруханаға жеткізілген.
«Сонымен қатар, сотқа дейінгі тергеп-тексеру жұмыстары барысында 14 қарашада жол жөндеу мекемесінің қызметкері жолды тазалауға жауапты бола отырып, тас жолды көктайғақтан тазарту жұмыстарын ұйымдастырмағаны және оның салдары өлімге әкелген апаттың болу себебіне алып келгенін анықтады», — деп мәлімдеді ауданның ПД баспасөз қызметі.
Аталған факті бойынша Қылмыстық кодекстің 353-бабының 4-бөлігі бойынша сотқа дейінгі тергеу амалдары басталды.
