Жамбыл облысында GPA 3,33-тен жоғары жоғары нәтиже алып, конкурстық рәсімдерден өтпей жұмысқа қабылданған педагогтерді қолдауға арналған диалогтік алаң өтті.
Жамбыл облысы әкімдігі білім басқармасының ұйымдастыруымен 2026 жылғы 17 наурыз күні GPA 3,33 баллдан жоғары нәтиже көрсетіп, конкурстық рәсімдерден өтпей жұмысқа қабылданған жас педагогтерге арналған облыстық диалогтік алаңы өтті.
Іс-шараның негізгі мақсаты – білім беру ұйымдарына конкурссыз қабылданған жас мамандардың кәсіби бейімделуіне қолдау көрсету, олардың жауапкершілік деңгейін арттыру және білім беру жүйесіндегі рөлін айқындау болды. Сонымен қатар, жас педагогтерге сенім білдіру арқылы олардың кәсіби өсуіне жағдай жасау, әдістемелік қолдау көрсету және тәжірибе алмасу алаңын қалыптастыру көзделді.
Диалогтік алаңға Жамбыл облысы әкімінің орынбасары Сәлемов Серік Жақсылықұлы, облыстық білім басқармасының басшысы Оршубеков Нұрбек Әбубекұлы, тәжірибелі ұстаздар мен білім беру ұйымдарының басшылары, сондай-ақ жас педагогтер қатысты. Сонымен қатар, 38 жыл еңбек өтілі бар, ардагер ұстаз, құрмет орденінің иегері Р.Әбуова мен Тараз қаласы, №48 орта мектебінің директоры Б.Есимова тәжірибелерін ортаға салса, жас ұстаздар мектепке бейімделу мүмкіндіктерімен таныстырды.
Іс-шара барысында жас мамандардың білім беру жүйесіндегі орны мен рөлі, олардың құқықтары мен кәсіби міндеттері, кәсіби бейімделу кезеңіндегі қолдау тетіктері жан-жақты талқыланды. Сонымен қатар, педагогтердің ұсыныстары тыңдалып, ашық пікір алмасу ұйымдастырылды. Алаңның маңызды бөліктерінің бірі – қатысушылардың кері байланыс сессиясы болды. Онда жас педагогтер өз ойларын ортаға салып, кәсіби дамуға қатысты нақты ұсыныстарын білдірді.
Аталған бастама – білім беру жүйесіне үздік академиялық көрсеткіштері бар түлектерді тартуға бағытталған маңызды қадамдардың бірі. GPA 3,33-тен жоғары нәтиже көрсеткен жас мамандарды қолдау – сапалы кадрлық әлеуетті қалыптастыруға және өңірдегі білім беру сапасын арттыруға мүмкіндік береді.
Диалогтік алаңның соңында әрбір жас маманнан «Бүгінгі алаңнан ең маңызды нәрсе — …» тақырыбы аясында қысқа фитбэк алынды.
Жамбыл облысы әкімдігі білім басқармасы алдағы уақытта да жас педагогтердің кәсіби дамуына жағдай жасап, олардың әлеуетін арттыруға бағытталған жүйелі жұмыстарды жалғастырады.
Іс-шараға, аудандық-қалалық оқу-әдістемелік кабинеттерінің басшылары, 105 жас маман барлығы 126 педагог қатысты.
