Петропавлда ЖЭО-2-дегі апаттар салдарынан жылу берудің бірнеше рет үзілуіне байланысты жылу мен ыстық суға қайта есептеу жүргізіледі, деп хабарлайды Stan.kz ақпарат агенттігі.
«Петропавл 2-ЖЭО-ны жылумен жабдықтау сапасына әсер еткен технологиялық ақауларға байланысты «Севказэнергосбыт» ЖШС тұтынылған жылу энергиясы деректері негізінде әр мекенжай бойынша жеке-жеке жылу мен ыстық суға қайта есептеу жүргізеді», — деп хабарлады баспасөз қызметі.
Қайта есептеу сомасы наурыз айындағы төлем құжаттарында бөлек жолда көрсетіледі, деп қосты компания.
- Үш күн үйіндінің астында жатқан: Петропавл жылу орталығында қаза болған келіншек жер қойнына тапсырылды
- Петропавлдағы құбырдың құлауы: Міндетін дұрыс атқармады деген күдікпен «Севказэнерго» АҚ бас директоры ұсталды
Еске салайық, 20 наурызда Петропавлдағы ЖЭО-2-де мұржа опырылып түскен болатын. Құбырдың сынықтары қазандық цехына түсіп, бірнеше қазандық агрегаттарын істен шығарған, соның салдарынан тұрғын үйлерде бірнеше күн жылу мен ыстық су болмаған.
Жылу электр орталығының жұмысшысы, 1984 жылы туған әйел үйінді астында қалды. Оның артында 15 жасар бір баласы қалды.
Бұл түтін құбыры 1961 жылы пайдалануға берілген. Құбырды күрделі жөндеу 2017 жылы аяқталды, ал тексеру, ережеге сәйкес, бес жылда бір рет жүргізіледі. Келесі жылы құбырды жөндеу қажет болатын.
https://stan.kz/petropavlda-zhilu-elektr-ortaligindagi-kybirdin-kylaui-362674/
