Жамбыл облысында биылдыққа 111 адам орыс тілі курсын оқыса, 577 адам ағылшын тілін үйренді. Неміс және кәріс тілдерін этно-мәдени бірлестіктер жанындағы оқыту курстарында 501 адам оқуда. Ана тілін оқу курсы бойынша 34 этномәдени бірлестік жетекшілеріне этнос тілдерін оқытуға әдістемелік көмектер көрсетілді. Қазақ тілін өз бетімен үйренгісі келетіндер саны да артуда. Осыған орай, тіл үйренудің IT жобасы — QazOnline мобильдік қосымшасы әзірленді.
Бұл туралы ӨКҚ баспасөз брифингінде әкімдіктің тілдерді дамыту басқармасының басшысы Рахия Тұрмаханбетова айтты. Ол қосымшаның қазақ тілін қарапайым деңгейде (А1) үйренудің 16 сабағынан тұратынын да атап өтті, А2, В1, В2 деңгейдегі сабақтары әзірленуде. Қосымшаны кез келген адам Play Market қосымшасы арқылы ұялы телефонына жүктеп алып, пайдалануына алады, қазіргі кезде 3187 адам жүктеген.
«Сонымен қатар, QazONLINE айдарымен қазақ тілін тез үйренуге бағытталған 70 сабақ әлеуметтік парақшаларда жарияланды. Этнос өкілдеріне тілдік орта қалыптастыру, қазақ тілін сөйлеу арқылы тез меңгеру мақсатында «Ашық аспан астында тіл үйренеміз», SŐILE және RELAX AND LEARN клубтары жобалары іске асырылуда. Жыл басынан 64 отырысы өткізіліп, 845 тіл үйренуші қатысты.Орыс тілді аудиторияға арналған мемлекеттік тілді ең қарапайым тәсіл арқылы үйретуге бағытталған «Қазақша үйренейік!» атты 25 телесабақ жергілікті арнада эфирге шықты», — деді спикер.
Рахия Сейтбекқызының айтуынша, бұдан басқа мемлекеттік тілді қолданудың аясы мен сапасын арттыруға бағытталған әлеуметтік желіде 5 жоба жүзеге асырылуда – Tarazlatyn, «Сауаттылық Time» және «Мен қазақша сөйлеймін», Termindi Bil, Til Bailyq жобасы.Өңірлік коммуникациялар қызметі
