Ш.Уәлиханов атындағы Жамбыл облыстық әмбебап ғылыми кітапханасы Қазақстан Республикасының Мемлекеттік рәміздерінің 30 жылдығына орай «Ерліктің нышаны – ерліктің белгісі» тақырыбында дөңгелек үстел ұйымдастырылды.Төрткүл дүниенің төрінде көк Туымыз тік шалқып, киелі шаңырақтан күн нұры шашылып, қанатты пырақтарымыз бейнеленген Елтаңбамыз төрден орын алып, оң қолымызды жүрек тұсына шегелеген Әнұранымыз мемлекеттің символы, бірліктің алтын тұғыры саналған Мемлекеттік Рәміздерді жас ұрпақтың санасына сіңіріп, ойына ұялату мақсатында ұйымдастырылған дөңгелек үстелде ел рәміздері мен авторлары жайында жан-жақты әңгіме болды.
Мұндай игілікті іс-шараға Тараз политехникалық колледжінің ағылшын тілі пәнінің мұғалімі Гүлайым Күмісбекқызы бастаған бір топ білімгерлер қатысты. Дөңгелек үстелдің ашылуы Мемлекетімізді әлемге танытатын Әнұранымызды айтудан бастау алды. Сондай-ақ дөңгелек үстелге қатысушы оқырмандарға кітапхана қызметкері Тәуелсіздіктің басты нышандары мен мемлекеттік идеологияның негізі – халқымыздың ғасырлар бойы аңсаған еркіндігін білдіретін мемлекеттік рәміздер болып табылатынын айта отырып, рәміздер жөніндегі мемлекеттік стандарттарға да тоқталды. Сонымен қатар, дөңгелек үстел барысында оқырмандарға кітапхана қорындағы кітаптар ұсынылып, өзара пікір алмасуға ұласты.Диас Шаухаров
