Тараз қаласының әкімі Бақытжан Орынбеков кезекті рет тұрғындарды жеке сауалдарымен қабылдады.
Қабылдау барысында азаматтар тұрғын үй, жер мәселесі, тал кесу, арық жүргізу барысындағы қауіпсіздік ережелері, жер учаскесін заңсыз қоршап алу, Тұңғыш Президент саябағында кәсіпкерлікпен айналысуға рұқсат, ауыз су құбырын ауыстыру, көшеге жол салу және жарық жүйесінің электр сымдарын дұрыс орнату мәселелері бойынша сауалдар қойды.
Сонымен қатар қабылдауға келген қала тұрғыны Таулы Қарабах ұрыс қимыл ардагерлеріне жер учаскесін бірінші кезекте беру, «Жеңіс» саябағында Таулы Қарабах қақтығысында қаза болған боздақтарды еске алуға арналған ескерткіш қоюға жер телімін бөлу, патриоттық іс-шаралар өткізуге қолдау көрсету және ардагерлерге жылына бір рет демалыс орындарына жолдама беру туралы мәселелер көтерді.
Бақытжан Әмірбекұлы азаматтардың сұрақтарына қолданыстағы заңнама талаптарына сәйкес жауап берді. Қабылдау қорытындысында жауапты тұлғаларға көтерілген түйткілдерді жан-жақты зерделеп, кезек күттірмейтін өтініш-тілектер бойынша тиісті шешімдер қабылдау тапсырылды.
Еске сала кетейік, «Халық үніне құлақ асатын мемлекет» тұжырымдамасы аясында азаматтарды жеке мәселелері бойынша қабылдау алдын ала жазылу арқылы тұрақты негізде жүзеге асырылады.