Бүгін Жамбыл облысы бойынша ҚАЖ департаментіне қарасты №59 мекемесінің ұжымы үшін ерекше әрі толғанысты күн болды. Өткен жылы жол-көлік оқиғасы салдарынан өмірден өткен, аталған мекемеде адал қызмет атқарған әріптесіміз Бауыржанқызы Арайдың артында қалған кішкентай екі қызын Жаңа жыл мерекесімен құттықтау мақсатында ұжым арнайы барды. Іс-шараға мекеме бастығы, әділет полковнигі Руслан Гарифуллаұлы, сондай-ақ мерекелік көңіл күй сыйлау үшін Аяз ата мен Ақшақар да арнайы қатысты.
Бұл — жай ғана мерекелік шара емес, бұл — әріптесімізді ешқашан ұмытпайтынымыздың, оның отбасы біздің әрдайым назарымызда болатынының айқын көрінісі. Арай өз ісіне жауапкершілікпен қарайтын, адамгершілігі жоғары, әрдайым айналасына жылу сыйлай білетін жан еді. Оның жарқын бейнесі мен еңбегі №59 мекеме ұжымының жадында мәңгі сақталады.
Жаңа жыл — мейірім мен үміттің мерекесі. Осы орайда, мекеме қызметкерлері Арайдың екі қызына сыйлықтар табыстап, жүрекжарды тілектерін білдірді. Ана орнының қашанда бөлек екенін терең түсіне отырып, ұжым тарапынан қолдан келгенше қолдау көрсету азаматтық әрі адамгершілік парыз деп танылды.
№59 мекеме ұжымы әріптесіміз Арайды әрдайым құрметпен еске алады. Оның жарқын бейнесі жүрегімізде, ал артында қалған балалары үнемі назарымызда болады. Марқұмның рухына тағзым етіп, есімін мәңгілік жадымызда сақтаймыз.
Айта кету керек, №59 мекемесінде Аяз ата мен Ақшақар бейнесінде балаларды, қызметкерлердің отбасын және әлеуметтік қолдауға мұқтаж жандарды Жаңа жыл мерекесімен құттықтау жыл сайын дәстүрге айналған.
Жаңа жыл баршаға амандық, бейбіт өмір, сабыр мен береке әкелсін.
