Қала әкімі Бақытжан Орынбеков ардагер мемлекеттік қызметші Күлімхан Тоғызбаевның 70 жас мерейтойымен құттықтады.
Шаһар басшысы Күлімхан Майлыбекқызына ізгі тілегін жеткізді.
– Бұл айтулы белес өмір жолындағы мол тәжірибенің, биік парасат пен кемелдіктің, ел мен өңірдің дамуына сіңірген еңбектің лайықты бағаланатын шағы.
Сіздің еңбек жолыңыз – көпке үлгі, жас ұрпаққа өнеге. Журналистика саласында бастаған қызметіңізбен қоғам тынысын айқын сезініп, елдің үнін жеткізе білдіңіз. Кейінгі жылдары мемлекеттік қызмет саласында абыройлы еңбек етіп, өңірдің әлеуметтік әрі рухани дамуына сүбелі үлес қостыңыз, — деді Бақытжан Орынбеков.
Сонымен қатар, Қазақстан Республикасының Парламент Мәжілісінің депутаты Гүлдара Нұрымова, қалалық мәслихат төрағасы Кенжебек Олжабай, қалалық ардагерлер ұйымының төрағасы Күләш Әбдікешова және «Жамбыл облысының іскер әйелдер Қауымдастығы» ҚБ төрайымы Меруерт Лештаева мерейтой иесіне ақжарма тілектерін жеткізіп, құрмет көрсетті.
