ҚҰРМЕТКЕ БӨЛЕНГЕН-БӨЛТІРІК ШӘМШІҰЛЫ
Тәуелсіздік мерекесі қарсаңында өңірдің дамуына сүбелі үлес қосқан азамат туралы аз-кем жазып өтсек артықтық етпес.
ДҮНИЕДЕГІ МАМАНДЫҚ АТАУЛЫНЫҢ ТӨРЕСІ ҰСТАЗДЫҚ. ОСЫ ҰСТАЗДЫҚ ЕТУДЕ АУДАНДА ӨЗІНДІК ОРНЫ БАР ҰЛАҒАТТЫ ҰСТАЗ, ІСКЕР, ТАЛАПШЫЛ БАСШЫ БОЛА БІЛГЕН БҮГІНГІ БІЗДІҢ КЕЙІПКЕРІМІЗ, ӘҢГІМЕМІЗДІҢ АРҚАУЫ БӨЛТІРІК ШӘМШІҰЛЫ ІЛИЯСОВ ТУРАЛЫ БОЛМАҚ.
Бөлтірік Шәмшіұлы Ілиясов 1954 жылдың 5 желтоқсанында Жамбыл облысы Сарысу ауданы, Игілік ауылында қарапайым шаруа отбасында дүниеге келген. Әкесі Шәмші Ілиясов пен анасы Алтынкүл Әбдірәліқызы Жұманбаева 1948 жылы отау құрып, зейнеткерлік жасқа жеткенге дейін Коммунар кеңшарында қазіргі Игілік ауылында мал шаруашылығымен айналысқан үлгілі отбасы.
Жастайынан білгір, еңбекқор Бөлтірік Шәмшіұлы 1972 жылы Оңтүстік Қазақстан облысы, Созақ ауданындағы Қ.Сәтбаев атындағы орта мектебін бітіріп, сол жылы арман қуған жас жігіт Шымкент қаласындағы педагогикалық институтына түсіп, 1976 жылы аталмыш оқу орнын үздік тәмамдайды. Алғашқы еңбек жолын 1976 жылы Досбол орталау мектебінде ұстаз болып бастайды. Онда бір жыл жұмыс жасап, 1977-1978 оқу жылында Игілік ауылындағы Коммунар орта мектебінде мұғалім болады. 1980-1983 жылдары осы мектептің директорының оқу ісі жөніндегі орынбасары болып еңбек етіп, 1983 жылдан бастап күні бүгінге дейін бір орында, ұзақ жылдар бойы Шоқай Датқа атындағы орта мектебінің директоры қызметін атқарып келеді. Бір орында тапжылмай басшылықта отыру, ол басшылық тарапынан үлкен сенімділік пен Бөлтірік ағайдың еңбекқорлығының арқасы деп білеміз.
«Ұстаз болу-өз уақытыңды аямау, өзгенің уақытын аялау» — деп француз ойшылы Жан Жак Руссо айтпақшы, ұстаздардың еңбегі ерен. Шәкірт санасына білім нәрін сеуіп, ел болашағының өрендерін тәрбиелеп шығару — екінің бірінің қолынан келе де бермейді. Ұстаз болу-жас ұрпақтың жарқын болашаққа барар жолын айқындап беру. Осындай ұлы қасиеттерді өз бойына жинаған Бөлтірік ағай бала тәрбиесіне келгенде өз уақтысын еш аяп қалмағанын бүгінде бәрі біледі. Заманауи білім берудің жаңаша жүйесі енген шақта жаңаша тәсілдер мен оқу тәсілдерін енгізіп, жас мамандарға ерекше қолдау көрсетті. Олардың біліктіліктерін арттыруға қолынан келгенше қолдау көрсете білді.
Бөлтірік ағайдың еңбекте жеткен жетістіктері де аз емес. Атап айтар болсақ, 1979 жылы жарыс жеңімпазы төсбелгісімен, 1982 жылы Қазақ ССР оқу министрлігінің Құрмет грамотасымен, 1998 жылы Қазақстан Республикасы оқу ісінің үздігі белгісімен, 2001 Тәуелсіздіктің 10 жылдық медалімен, 2013 жылы «Сарысу ауданының Құрметті азаматы» атағы берілді. 2015 жылы «Қазақ хандығының 550 жылдығына» орай төсбелгісімен, алғашқы ұстаз Ы.Алтынсарин атындағы медалімен марапатталған.
Сонымен қатар, аудандық мәслихаттың 2,3,4,6 кезеңінің депутаты болды. Аудандағы түрлі іс-шараларға да қатысып, белсенділік көрсетіп жүреді.
2018 жылы пайғамбар жасына жетіп, ұзақ жыл ұстаздықтың бейнетінен зейнеткерлікке шығып отыр. Бір отбасының тірегі, немерелерінің ардақты атасы болған Бөлтірік ағай Маханбетова Сырғакүл апаймен отбасын құрып, 6 ұл-қызды дүниеге әкеліп, олардан 16 немере тәрбиелеп отырған ата мен әже және үлгілі отбасы.
Бүгінде ауыл ішінде ғана емес, аудан көлемінде сыйлы Бөлтірік Шәмшіұлы Игілік ауылдық округі қоғамдық кеңесінің төрағасы.
Ұзақ жылғы еңбегі еленіп, Тәуелсіздіктің 30 жылдығы медалінің иесі атанды.
Айтулы мерекеде алған марапаты болашақ ұрпақтарды білімге ұмтылдыру жолында шарапаты тиері сөзсіз.
Сарысу ауданы
