Біз осы кезге дейін «ел іргесі сөгілмесін, елімізде тыныштық болсын, тәуелсіздігіміз тұғырлы болсын» деген сөздерді естігенде оның астарына анағұрлым мән бермеген болармыз. Расында солай болып келді, заманның ауыртпалығын сезінбеген бүгінгі ұрпақ басбұзарларға еріп, бейбіт жатқан ел ішін ойрандады. Тыныштығымызды алған сол бір тұрақсыздықтың салдарынан экономикаға көптеген шығын келді. Етек-жеңін жиып, жасампаздыққа жол бастаған елдің қос бүйірінен соққы тиді. Салдары қандай екенін біліп жатқан боларсыз.Иә, жылдың басы осындай жағдайлармен басталғаны өкінішті. Арты жақсы болсын дейміз.
Бүгінде Президент жарлығына сәйкес елімізде төтенше жағдай енгізілді. Аймақтарда қауіптің шекті деңгейі енгізіліп, қалаға кіреберіс күре жолдардың барлығына блок бекеттер қойылды. Белгілі бір уақыт аралығында коменданттық сағат енгізілді.
Иә, қарт тарих халқымыздың қай кезеңіне де куә. Бұл жағдай да өтер, кетер. Бірақ кез келген мәселенің шешімі, толыққанды түйіні болады.
Мемлекет басшысы халықтың өмір сүру деңгейі мен азаматтардың әлеуметтік жағдайын жақсартуды көздеп отыр. Оған Қ.К Тоқаевтың мына бір сөзі дәлел. «Қастерлі Отанымыз – Қазақстан әлем картасындағы егемен ел ретінде қуатты мемлекетке айналады, экономикамыз анағұрлым қарқынды дамиды, азаматтарымыздың әлеуметтік жағдайы жақсара түседі. Мен мұны зор сеніммен айтып тұрмын» деген еді Президент өз үндеуінде. Мемлекет басшысының қиын жағдайда елмен бірге болып, маңызды шешімдер қабылдауы расында халықтың біртұтастыққа және жарқын болашаққа деген сенімін оятты. Бастысы, халқымыз жамандықтан аулақ болсын дегім келеді.
Ғалым Бозжігітов
Ыбырайым Сүлейменов атындағы орта мектебінің директоры
#Күшімізбірлікте
