Халық артисі Роза Рымбаева 80 жылдары қазіргі кездегідей «той әнші», «хит әнші» деген түсінік болмағанын айтады.
Розаның айтуынша, атақты болу үшін ән байқауларға қатысып, одан жеңіп шығу қажет. Әншінің өнердегі жұлдызы осындай ән сайысынан жанған, деп хабарлайды Экспресс К. Халық артисі 1977 жылы Болгариядағы «Алтын Орфей» фестивалінде Кеңес Одағының батыры Әлия Молдағұловаға арналған «Әлия» әнін шырқаған соң ерекше танымал болды. Өнер иесі бұл байқауда гран-при жүлдесін жеңіп алды. Әнші одан кейін де біраз сайыстарға қатысып, жеңімпаз атанды.
«Сахнада ән салып жүргеніме 50 жылға жуықтап қалды. Менің дауысымды сақтаған сол байқаулар. Біріншіден дауысым табиғи. Екіншіден көбінесе жанды дауыста орындайтын болғандықтан дауыспен дұрыс жұмыс істедім. Ондай кезде дауыс сақтала береді. Кәсіби жұмыс істедім. Мен сол үшін оқыдым. Сол үшін іздендім. Сол үшін мен талай емтиханнан өттім. Тек Қазақстан, біздің тойлар ғана емес. Халықаралық деңгейдегі талай емтихандардан өттім. Өнердегі бағым конкурстардан ашылды. Ол кезде жаңағы «хит әнші», «той әншісі» деген ондай түсінік жоқ еді. Байқаудан жеңіп шыққандар ғана атақты болатын», — дейді Роза «Әйел әлемі» бағдарламасына берген сұхбатында.
