Елімізде ісінен гөрі, айтқан бір сөзімен-ақ хит болып кететін шенділер жетерлік. Өткен жылы да ондайлар аз болмады.
Ауамен қоректенетін министр
Солардың бірі Ұлттық экономика министрі Әсет Ырғалиев. Оның елдегі шарықтап кеткен азық түлік бағасына қарамастан «айына азық-түлікке 50 мың теңге жұмсайтынын» естігенде талай жұрт таң қалған болатын. Көзбояушылықтың жөні осы екен деп, өтірік айтудан ұялмаған министрдің сөзі біраз уақыт ел шінде хит те болды. Әлеуметтік желіде «анорексияға ұшырамай қалай жүр байғұс», «Қателесіп мейрамханаға бір кіріп шыққандағы түскі асын айтты ау», «ауамен қоректене ме не бәле» дескен жүрт біразға дейін министрдің сөзін хит қылды. Айлық табысы 900-950 мың теңгені құрайтын министр барынша қарапайым көрінгісі келді ме журналистің сұрағына «Бәрі сатып алатын нан, сүт, қант аламыз. Басқа не айтуым керек екен? Біздің де отбасымыз дәл сіздердікіндей-ақ» дегені талай жұрттың езуіне күлкі үйірді. Осыдан соң журналистер министр мен әкімдердің жалақысының көлемін, ай сайын азық түлікке қанша жұмсайтынын сұрауды әдетке айналдырды.
«Отбасы банкі» басшысы коронавирустың жаңа штамын «ойлап тапты»
Ал жақында ғана «Отбасы банкінің» басшысы Ләззат Ибрагимова баспасөз конференциясында «омикрон» штамын қателесіп «Оксимарон» деп атап қалды. Кейін әлеуметтік желі қолданушылары оның қателесіп айтқан сөзін іліп әкетіп, түрлі әзілдерге арқау етті. Бұл әзіл әлеуметтік желілерде тарап кетті, тіпті «Ол Оксимироннан көз жұмды» деген тіркес пайда болды.
Ләззат Рамазанова:«Ауылдық жерден тұрмысы төмен отбасы табу қиын»
Мәжіліс депутаты Ләззат Рамазанованың «Әйелдер кәсіпкерлігі: жаңа мүмкіндіктер мен проблемалар» брифингінде ауылда жағдайы төмен отбасы табу қиын екенін айтқан сөзі де көпшіліктің көңілін аударды. «17 өңірдің барлығын аралап, ауылды жерде азып-тозған отбасыны таппадым. Себебі ауылда проблемасы бар отбасыға барлығы жұмылып көмектеседі. Ауылдағы ағайынның барлығы бір-біріне дос, ағайын болады. Ал үлкен қалаға өз өңірінен келгендерде барлық қиындық басталады. Себебі көмектесетін, ақыл айтатын ағалары да, апалары да болмайды», — дейді депутат. Ауылдағы жұмыссыздыққа қарамастан, Мәжілісменнің айтқан пікірі де талай күн әлеуметтік желіде талқыға түсті.
Мұхамеджан Тазабек: «Есік алдына он жыл байлап қойсаң да депрессия боп жатқан төбет жоқ»
Talim TV арнасының директоры, бұрынғы айтыскер Мұхамеджан Тазабектің тоғызыншы қабаттан балаларымен секіріп қайтыс болған әйел оқиғасына қатысты пікірі де дауға қалды. «Құздан құлаған ана, құрбан болған үш перзент…Әр істің артында себеп бар, әр бақытсыз жанға виноват замандас бар. Адам деген атты арқалағанмен хайуан бармайтын хәлге түсіп, ең жаманымыз күпірге барып, өз перзентін өзі зорлап, ата-анасын зар илетіп, жан-жағын запыран құстыртуда», деп жазған ол адамнан басқа жаратылыстың өз жөнімен жүргенін атап өтеді. Қайғылы оқиғаны аң-құс дүниесімен салыстыра келе «Есік алдына он жыл байлап қойсаң да депрессия боп жатқан төбет жоқ, қалдық жеп, қара шаруадан босамаса да құса боп өлген есек жоқ», деп пікір білдірген. Ал әлеуметтік желі қолданушылар ақынның бұл пікірін орынсыз шешендікке балап, мұндай салыстырудың әдепке жатпайтындығын және әсіредіншілдікпен байланыстыра сынға алды.
Мағзұм Мырзағалиев: «Расында, маған бәріміз бірдей өмір сүретін сияқтымыз»
ҚР Энергетика министрі Мағзұм Мырзағалиев Сенат отырысында отбасының азық-түлікке айына 200 мың теңге жұмсайтынын айтып, «бұл сұрақ журналистерді неге сонша қызықтыратынын білмеймін. Расында, маған бәріміз бірдей өмір сүретін сияқтымыз. Менің отбасым басқа орташа отбасылар сияқты ақша жұмсайды. Әрине, 50 мың теңгемен өмір сүру мүмкін емес. Айына шамамен 200 мың теңге жұмсаймыз», – деген болатын. Министрдің бұл сөзін де талай уақыт халық талқыға салды. Айлығы миллионды құрайтын министрдің «Менің отбасым басқа орташа отбасылар сияқты ақша жұмсайды» деуі жалақысы 200 мың теңгені маңайламайтын талай жанұяның балалары ашқұрсақ екенін, алма пен шұжық түсіне кіретінін сезіне алмай, «бәріміз бірдей өмір сүретін сияқтымыз» дегені де талай жұрттың ашуына тиді. Талай «орташа отбасылар» азық-түлікке айына екі жүз мың жұмсағысы келсе де жұмсай алмайтынын сынға алғандар көп болды.
https://zhasalash.kz/kogam/sozderimen-hit-bolgan-shendiler-19155.html
