Түркістан обылысы Сайрам аудандық Полиция басқармасына Түлкібас ауданының тұрғыны арызданды. Әйелдің айтуынша, оның Сайрам ауданындағы колледждердің бірінде оқитын 17 жасар қызы жұма күні сабаққа кеткеннен қайта үйіне оралмаған.
Қыз мүлдем байланысқа шықпаған. Сенбі, жексенді күндері туыстары өз беттерінше іздегенімен жасөспірімді таппаған. Содан дүйсенбі күні полицейлерден көмек сұрайды.
Ақпарат алысымен сайрамдық тәжірибелі сақшылардан жедел тергеу тобы құрылды. Полицейлер жасөспірім қыздың таныстары, дос-құрбыларынан жауап алды, жан-жақты сұрастыру жұмыстарын жүргізді. Бір аптаға созылған іздестіру шаралары нәтижесінде жедел уәкіл полиция капитаны Тимур Саитов қызды Шымкент қаласындағы саябақтардың бірінен тауып, отбасына аман-есен жеткізді.
Анықталғандай, қыз бұдан алдын да бірнеше рет үйінен кетіп қалып, полицейлердің көмегімен табылған. Бұл жолы құрбыларымен сөзге келген ол Шымкент қаласына бет алған. Сондағы таныстарының үйіне қонып жүрген. Отбасымен дін аман қауышқан қызбен психологтар түсіндірме жұмыстарын жүргізді. Оған қоса оның ата-анасына қатысты Әкімшілік құқық бұзушылық кодексінің 442-бабы (кәмелетке толмағандардың заңды өкілдерінің еріп жүруінсіз түнгі уақытта ойын-сауық мекемелерінде немесе тұрғынжайдан тыс жерде болуы) бойынша әкімшілік хаттама толтырылды.
Түркістан облыстық Полиция департаменті баспасөз қызметінің хабарлауынша, тұрғындардың арасында ересек туыстарын жоғалтып, полициядан жәрдем сұрайтындар да кездеседі. Мәселен, Сайрам аудандық полициясына жас әйел арызданып, жұмысқа кеткен күйеуі келмегенін айтқан. Тез арада іздестіруге кіріскен тәртіп сақшылары, жас жігітті Шымкент қаласынан тауып, үйіне қайтарды. Оның табылуына да жедел уәкіл Т.Саитов ықпал еткен.
https://zhasalash.kz/video/sajramda-zhogalgan-qyz-bir-aptadan-kejin-tabyldy-19096.html
