Еліміздегі өнеркәсіп саласының маңызды секторларының бірі – ол тамақ өнеркәсібі. Ал, тамақ өнеркәсібі агроөнеркәсіптік кешендегі өңдеуші саланың бір бөлігі болғандықтан, халықтың тағамға деген сұранысын қанағаттандырады.
Ауыл шаруашылығы тамақ өнеркәсібінің негізгі шикізат көзі болып табылатындықтан, біздің облыста ет, сүт, ұн, қант өнімдерін өндіру салалары жақсы дамыған.
Қазіргі кезде тамақ өнімдерін шығаратын кәсіпорындар заман талабына сай жаңа техникамен және технологиямен жабдықталып, өз жұмыстарын жүргізуде. Солардың бірі макарон өнімдерін өндіретін «Mark of perfection» серіктестігі.
Елімізде қамыр өнімін өндіруге, макарон өніміне жаңа сауда белгісін енгізу мақсатында ісін бастаған кәсіпорын бүгінде «Asatu» және «Бір асым етке» жаймаларымен танымал. Іске қосылған жылдан бері көптеген жетістіктерге қол жеткізген серіктестік 2021 жылдың қорытындысы бойынша республика көлемінде үздік деп танылып отыр.
Осыған орай, бүгін ауыл шаруашылығы басқармасының мәжіліс залында серіктестік ұжымын марапаттау рәсімі өтті. Шара барысында басқарма басшысы Ербол Жиенқұлов кәсіпорын қызметкерлерін жеңістерімен құттықтап, серіктестік директоры Болат Жетпісбаевқа Қазақстандағы халықаралық Ұлттық бизнес-рейтингтер одағының арнайы алтын медалі мен «Сала көшбасшысы 2021» сертификатын табыстады.
Сондай-ақ, Болат Жақсылықұлына «Сала мақтанышы» орденін, бірқатар қызметкерлерге «Кәсіби үлесі үшін» медалі мен «Үздік маман» куәлігін тапсырды.
Жиын соңында «Mark of perfection» серіктестігінің ұжымы өз алғыстарын білдіріп, естелік суретке түсті.
