Студенттер мен оқушылар үшін бұл шара жаңа тәжірибе, болашақ мамандық таңдаудағы маңызды қадам және патриоттық рухты қалыптастыратын ерекше мүмкіндік болды.
«Жастар Рухы» Жастар қанаты «Сарбаз болғым келеді» деп аталатын акция аясында барлық өңірлерде оқушылар мен жастарды арнайы әскери және өрт сөндіру бөлімдеріне интерактивті-танымдық шолу жасады, деп хабарлады turkystan.kz.
Осы апта бойы іс-шара «Qaisar» әскери-патриоттық жобасы аясында ұйымдастырылып, жастардың төтенше жағдай қызметі мен әскери салаға деген қызығушылығын арттыруға бағытталды.
Акцияны тұрақты негізде өткізіп тұратын Жастар қанаты төрағасы Ақерке Искандерованың айтуынша бұл жоба Жеңістің 80-жылдығы қарсаңында ерекше сипатқа ие болуда.
«Qaisar» әскери-патриоттық жобасы бастау алғаннан бері біздің өңірлерде түрлі форматтағы іс-шаралар кешені жүзеге асуда. 2022-2023 жылдары әскери-патриоттық ойындары ұйымдастырылып, аймақтық ойындарға 5 мыңға жуық оқушы қатысты. Ал, «Сарбаз болғым келеді» акциялары мен диалог алаңдарында 7 мыңнан астам адам қамтыдық. Биыл да, Жеңістің 80-жылдық мерейтойы қарсаңында осы қарқыннан таймай, мектеп оқушылары, колледж бен университет студенттерін қамтитын әскери бағыттағы шаралар өткізу жоспарда бар», — деді Ақерке Искандерова
Акция аясында жастарға өрт сөндіру қызметінің құрылымы, арнайы техника мен жабдықтардың жұмыс істеу принциптері, өрт сөндірушілердің жұмыс тәртібі мен қиындықтары туралы толық ақпарат берілді.
«Өрт сөндіруші болу — ерлік пен жанқиярлықты талап ететін мамандық. Біз тек өртпен күресіп қана қоймай, адамдардың өмірін құтқару үшін тәулік бойы дайын боламыз. Қатысушылар үшін ең қызықты сәттердің бірі өрт сөндіру техникасы мен арнайы құрал-жабдықтарды өз қолдарымен ұстап көру болды. Біздің мамандар оларға өрт сөндірудің негізгі элементтері, жабдықтардың жұмыс істеу принциптері және бөлімшелердің құрылымы туралы толық ақпарат берді», — дейді Атырау облыстық №1 мамандандырылған өрт сөндіру бөлімінің маманы.
Осылайша жастар өрт сөндірушілердің арнайы формасын киіп көріп, құтқару жабдықтарын қолданып, кәсіби мамандардың жетекшілігімен өрт сөндіру жаттығуларына қатысты.
ҚР Ақтөбе облыстық Ұлттық ұланының 6655 әскери бөлімі, тәрбие және әлеуметтік-құқық жұмыстар бөлімше бастығының көмекшісі, аға лейтенант Заңғар Ермекбаев: «Әскери бөлімдерде жастар сарбаздардың күнделікті өмірімен танысып, әскери техника мен қару-жарақ түрлерін көрді. Оларға әскери қызметтің тәртібі, жауынгерлік дайындықтың маңызы түсіндірілді. Жастар үшін осындай кездесулер өте маңызды. Бұл олардың патриоттық рухын арттырып, жауапкершілік сезімін қалыптастырады. Кейбір қатысушылар әскери жаттығуларға қатысып, сарбаздардың қатаң тәртібін өздері сезініп көрді. Іс-шара жастардың патриоттық рухын көтеруге, жауапкершілік пен борыш сезімін қалыптастыруға бағытталды».
Ұйымдастырушылардың айтуынша, «Сарбаз болғым келеді» акциясына республика бойынша 1500-ге жуық жас қатысқан екен. Студенттер мен оқушылар үшін бұл шара жаңа тәжірибе, болашақ мамандық таңдаудағы маңызды қадам және патриоттық рухты қалыптастыратын ерекше мүмкіндік болды.
«Бұл мамандықтың қаншалықты қиын екенін өз көзімізбен көрдік. Әскерилердің қайсарлығына тәнті болдық. Бала кезімнен әскери адам болуды армандайтынмын. Бұл тәжірибе менің таңдауымды одан әрі нығайтты. «Сарбаз болғым келеді» акциясы бізге өрт сөндірушілер мен әскери қызметшілердің нағыз жұмысын көруге, олардың еңбегін бағалауға мүмкіндік берді», — дейді студент Қамбар Нұрислам.
Сурет: «Жастар Рухы» Жастар қанаты
https://turkystan.kz/article/255998-sarbaz-bolgym-keledi-aktsiiasyna-1500-ge-zhuyk-zhas-katysty
