Сарысу ауданында 17–35 жас аралығындағы белсенді, еңбегімен ерекшеленген жастарды ұлықтауға арналған «SARYSU AWARDS» салтанатты марапаттау шарасы өтті.
Аудандық мәдениет үйінде өткен кеш аудан әкімдігінің ішкі саясат бөлімінің «Жастар ресурстық орталығы» КММ-нің ұйымдастыруымен өткізілді. Шараның басты мақсаты – түрлі салада табысты еңбек етіп жүрген жас мамандарды қолдау және жастарға мотивация беру. Салтанатты жиында аудан әкімінің орынбасары Жанғозы Жаркенов құттықтау сөз сөйлеп, мемлекеттік жастар саясатын жүзеге асырудағы жастардың және «Жастар ресурстық орталығының» маңызды рөлін атап өтті.
Марапаттау барысында ауданның жас үздіктері анықталып, «Үздік жас ұстаз», «Үздік жас жұмысшы», «Үздік жас мемлекеттік қызметкер», «Үздік жас кәсіпкер», «Үздік жас спортшы», «Үздік жас медицина қызметкері», «Үздік жас полиция қызметкері», «Үздік жас құтқарушы», «Үздік жас волонтер», «Үздік студент» және «Үздік оқушы» сынды номинациялар бойынша арнайы статуэткалар табысталды. Кеш соңы көтеріңкі көңіл-күй сыйлаған концерттік бағдарламаға ұласты. Тараз қаласынан арнайы келген «Нақыш» тобы әсем әнмен көрерменді тәнті етсе, «ГАММА» жайдарманшылар тобы думанды кештің көркін қыздырды. Сонымен қатар, аудан өнерпаздары да өз өнерлерін ортаға салды.
Еңбегімен елге үлгі болған жастар – Сарысудың басты байлығы.