Күні кеше ауданымызға ҚР Парламенті Сенатының депутаты Бекболат Орынбеков жұмыс сапарымен келіп, бірқатар құрылыс нысандарын аралады.
Халық қалаулысы ең алдымен Тасөткел су қоймасындағы құрылыс жұмыстарымен танысып, егістік жерлерді сумен қамтамасыз етуге қатысты мәселелерді көзбен көрді. Қазіргі кезде аталған су қоймасын сейсмикалық нығайту жұмыстары қолға алынған. Атқарылған жұмысты көзбен көрген Бекболат Серікбекұлы мұндағы түйткілді мәселелерге де құлақ түріп, құрылыс жұмыстарын мейлінше ширата түсу керектігін жеткізді.
Бұдан әрі Б.Орынбеков Шу қаласындағы «Жетісу» тұрғын үй массивіндегі 5 қабатты 75 пәтерлі тұрғын үйлердің қазіргі жағдайын көзбен көрді. Бұған дейін мұндағы бес тұрғын үйдің біреуі қайта жаңғыртылып, күрделі жөндеу жұмыстары жүргізілген болатын. Ал, қалған төрт тұрғын үй әлі күнге жөндеу көрмеген. Қазіргі кезде үйдің сейсмикалық нығайту жұмыстарына қажетті құрал-жабдықтардың бірнеше есеге қымбаттауына байланысты қалған тұрғын үйлерге күрделі жөндеу жұмыстарын жүргізу тиімсіз деп табылды.
Аудандағы жұмыс сапары барысында Сенат депутаты «Amanat» партиясы аудандық филиалының мәжіліс залында аудандық мәслихат депутаттарымен кездесіп, халық қалаулыларының ұсыныс-пікірлеріне де құлақ түрді. Сондай-ақ, аудан орталығындағы әл-Фараби атындағы орта мектепке де арнайы барды. 300 оқушыға шақталған мектеп құрылысының жартысынан көбі аяқталғанымен, қалған бөлігі тұралап қалғанына бірнеше айдың бедері болған. Алайда, соңғы бірнеше айда мұндағы құрылыс қарқыны қайта жандана түсті. Жұмысты көзбен көрген Сенатор құрылысты одан әрі ширатып, ел игілігіне ертерек беру керектігін айтты.
Аудандағы жұмыс сапарының соңында Бекболат Серікбекұлы Балуан Шолақ ауылдық округіндегі «Иррегациялық-дренаждық жүйелерді жетілдіру» бағдарламасы аясында атқарылып жатқан жұмыстармен танысты.
