Қордай ауданына жұмыс сапарымен Қазақстан Республикасы Парламенті Сенатының депутаттары Бекболат Орынбеков пен Сәкен Арубаев келді. Сапар мақсаты – әлеуметтік нысандардың жай-күйімен танысу, мемлекеттік бағдарламалардың жүзеге асырылуын бақылау және халықпен кері байланыс орнату.
Аталған нысандар бойынша таныстыру жұмыстарын Қордай ауданы әкімінің орынбасары Бақыт Сахатов жүргізді.
Алдымен делегация Қордай ауылындағы аудандық орталық аурухананың жұмысымен танысты. Мұнда медицина қызметінің сапасы, дәрігерлердің жұмысы және мекеменің материалдық-техникалық базасы талқыланды. Кейін Д.Қонаев атындағы №1 мектеп-гимназияға барып, мектеп ғимаратының жағдайына назар аударды. Сондай-ақ, депутаттар Қордай ауылындағы көпқабатты тұрғын үйлерді жылумен қамтамасыз ететін қазандықтың жұмысын көріп, қыс маусымына дайындығы жөнінде тиісті ақпарат алды.
– Аудан тұрғындары үшін сапалы медициналық қызмет пен жылы әрі қауіпсіз тұрғын үй – басты қажеттілік. Сондықтан мұндай нысандарды жаңғырту мен қолдау үнемі назарда болуы тиіс. Бүгін біз оң өзгерістерді көріп отырмыз, бірақ жүйелі жұмысты одан әрі жалғастыру қажет, – деді сенатор Бекболат Серікбекұлы.
Сапар аясында Сенат депутаттары «Жайлы мектеп» ұлттық жобасы аясында салынып жатқан білім нысандарына да барды. Айта кету керек, Жамбыл облысында 2023–2025 жылдары «Жайлы мектеп» жобасы аясында жалпы 9500 оқушыға арналған 12 мектептің құрылысы жоспарланған. Соның ішінде екеуі Қордай ауданында салынуда. Атап айтқанда, Қаракемер және Қарасу ауылдарында 300 орындық мектептердің құрылысы 2024 жылы басталған. Жоспарға сәйкес, қос мектеп 2025 жылы толық пайдалануға берілуі тиіс.
Депутаттар құрылыс жұмыстарымен танысып, жауапты мердігерлерге белгіленген мерзім мен сапа талаптарын қатаң сақтау керектігін ескертті.
– Мемлекет басшысының бастамасымен іске асып жатқан «Жайлы мектеп» жобасы – ауыл мен қала арасындағы білім беру сапасының алшақтығын азайтудың нақты құралы. Құрылыс жұмыстары белгіленген мерзімде және сапалы атқарылуы тиіс. Бұл – балалардың болашағына салынған инвестиция, – деді Сәкен Арубаев.
Сонымен қатар делегация Сортөбе ауылындағы М.Мәметова атындағы орта мектептің жылу қазандығының жұмысын да қарап шықты. Жауапты мамандарға тиісті ескертулер мен ұсыныстар берілді.
Сапар қорытындысында Сенат депутаттары аудан басшылығына бірқатар нақты ұсыныстарын білдіріп, әлеуметтік нысандардың құрылысын тұрақты бақылауда ұстау және тұрғындардың өмір сапасын арттыру бағытындағы жұмыстарды жалғастыру қажеттігін айтты.
