Жамбыл облысы денсаулық сақтау басқармасының басшысы Сержан Назарбек Жамбыл облыстық перинаталдық орталығына зерделеу жасады. Бұл — акушерлік-гинекологиялық және неонаталдық көмектің толық көлемін көрсететін үшінші деңгейлі медициналық мекеме. Орталықта тәулік бойы жұмыс істейтін 305 төсек-орын бар (210-ы — акушерлік, 95-і — жаңа туған нәрестелерге арналған). Биылғы 10 айда мұнда 6 013 босану қабылданып, 6 086 сәби дүниеге келген.
Сержан Назарбек жұмысын әлеуметтік желілер мен БАҚ-та кеңінен сөз болған босанушы әйелмен кездесуден бастады. Орталықтың емдеу ісі жөніндегі орынбасары Шолпан Жапаркүлованың айтуынша, пациенттің қазіргі жағдайы қанағаттанарлық: гемодинамикасы тұрақты, зертханалық көрсеткіштері жақсарып келеді. Әйелге қажетті медициналық көмектің толық тиісті көлемі көрсетілуде.
Жаңа туған нәрестенің өліміне қатысты Жамбыл облысы денсаулық сақтау басқармасы сыртқы тәуелсіз сарапшыларды тарта отырып, арнайы жұмыс комиссиясын құрған. Қазіргі таңда комиссия материалдарды жинақтап, тексеру жүргізуде.
Одан кейін басқарма басшысы ересектер реанимациясын аралап, интенсивті терапияның ұйымдастырылуы мен заманауи медициналық жабдықтармен қамтамасыз етілу деңгейін бағалады. Ол ауыр жағдайдағы науқастарды тәулік бойы бақылау жүйесіне және реанимациялық іс-шаралардың уақтылы орындалуына ерекше назар аударды. Сержан Назарбек жаңа туған нәрестелер реанимациясына барып, шала туған және жағдайы ауыр балаларды күтіп-баптау жағдайларымен, бөлімшенің техникалық мүмкіндіктерімен танысты. Аралау соңында босану бөлімінің жұмысын қарап, босану залдарының жабдықталуын, аналардың жағдайын, сондай-ақ дәрігерлер мен орта буын медицина қызметкерлерінің жұмыс тәртібін бағалады.
Басқарма басшысы көрсетілетін медициналық көмектің ұйымдастырылуына және арнайы емдеу стандарттарының сақталуына оң бағасын берді. Орталық ұжымымен кездесуде көрсетілетін көмектің сапасына қатысты клиникалық және ұйымдастырушылық мәселелер талқыланды.
Басқарма басшысы перинаталдық көмектің сапасы мен қолжетімділігін арттыруды, сондай-ақ жоғары қауіп тобына жататын жүкті әйелдерге, босанушыларға және жаңа туған нәрестелерге тиімді көмектің көрсетілуі үшін орталықтың материалдық-техникалық базасын нығайтуды тапсырды.
