Үржар ауданының 34 жастағы тұрғыны Гүлнәр Қайратқызы толғағы жеткенде, аудандық ауруханаға өз аяғымен барған. Күйеуінің айтуынша, төртінші баласын босануға барған ананың сол кездегі денсаулығы да жақсы болған. Бірақ екі-үш күн өткен соң Гүлнар нәрестесімен бірге көз жұмды.
“Сол күні кешкі сағат алтыда барып едім, кіргізбей қойды. Кешкі сағат 21:00-де өздері емес, көршім арқылы қоңырау шалып, ауруханаға тез баруымды айтты. Ауруханаға барғанымда, дәрігерлер бір-біріне сілтеп, жолдасымның және нәрестенің өмірден озғанын айтты. Аурухана басшылары мен дәрігерлердің біліксіздігінен жолдасымнан және сәбиімнен айырылып отырмын”, – деді марқұмның күйеуі Ұлан Балапанов.
Қара жамылған отбасы әйел бұрын-соңды денсаулығына шағымданбағанын айтады. Олардың айтуынша, қайғылы жағдайдан кейін жұмысынан қуылған ақ халаттылар қайта қызметіне кіріскен.
“Облыстық денсаулық сақтау басқармасының бастығы ауданның бас дәрігеріне қатаң сөгіс жариялап, екі орынбасарын міндетінен шектеу туралы ғана жарлық шығарды. Бірақ мазақ қылғандай, ол екі орынбасары осы аурухананың орынбасары болып тағайындалды. Халық қайран қалып отыр”, – деді ер адам.
Денсаулық сақтау басқармасы осы жағдайдан кейін аудандық ауруханаға мониторинг тобын жіберіп, қызметтік тексеріс жүргізген. Жедел штаб құрылып, еңбек кодексіне сәйкес бас дәрігерге қатаң сөгіс жариялаған. Ал орынбасарлары жұмыстан босатылған дейді. Сондай-ақ, полиция ана мен бала өліміне қатысты тергеу жүргізіп жатыр.
“Қызметтік тексеру барысында әйелдің босану протоколына сәйкес жүргізілгені анықталды. Босану кезінде пайда болған асқынулар қайтымсыз салдарға әкелді. Қазір сот медициналық сараптамасының түпкі қорытындысы жоқ болғаннан кейін диагнозді түсіндіре алмаймыз”, – деді Абай облысы денсаулық сақтау басқармасы бөлім басшысының орынбасары Әсем Орынбаева.
Гүлнар мен Ұланның мектеп қабырғасында оқитын екі қыз, бір ұлы бар. Үш баланы анасынан айырғаны үшін денсаулық сақтау министрі аудандық ауруханаларды тексеріп, өлімнің нақты себебін анықтасын деп отыр.
https://ozgeris.info/ush-bala-anasyz-qaldy-bosanuga-oz-ayagymen-bargan-%D0%B0jel-s%D0%B0biimen-birge-koz-zhumdy/?fbclid=IwY2xjawIir5RleHRuA2FlbQIxMQABHRS6bFiHOdkpv0Vgb38Ive_wdxtwy0VPVYkEopDCNxufc3ELa0nLjtPwYQ_aem_RVWeyMwoHWyGFD_6580wBQ
фото; Видео кадры
