Облыс орталығын көркейту мақсатында жұмыстар жалғасуда. Аталмыш жұмыстардың барысын облыс әкімі Асқар Мырзахметов облыстық мәслихаттың кезектен тыс өткен сессиясында берген есебінде мәлімдеді, – деп хабарлайды «shanyraqinfo.kz» ақпарат агенттігі.
– «Жеңіс» саябағында «Даңқ залы» мен «Бауыржантану» ғылыми зерттеу орталығы пайдалануға берілді.
«Шахристан» тарихи-мәдени кешенінде 6 жобаның құрылысы жүргізілуде. Олар – «Руханият» орталығы, «Қолөнер шеберлерінің галереясы», «Көркемдік-бейнелеу өнері галереясы», «Өлкетану мұражайы», «Көрме павильоны», «Ретро-фестиваль» амфитеатры».
Тараз қаласындағы 128 көшеде 35 шақырымға полиэтилен құбырларын салу жұмыстары 78 пайызға аяқталды, Такенов, Ташкент және Фазлаев көшелерінде асфальт жабындысын қалпына келтіру жұмыстары жүргізілуде.
Жылумен қамту жүйелерін жаңарту үшін 10 шақырымды құрайтын М-4 және М-2 жылу магистралін ауыстыру жұмыстары жүргізілуде.
Қаладағы 55 көше мен 85 бұрылыстың орташа жөндеу жұмыстарына 1,5 миллиард теңге бөлініп, қоғамдық көлік қатынайтын 83 көшеге ағымдағы жөндеу жұмыстары жүргізілді (22,6 мың шаршы метр).
Барлық шағын аудандардағы және көпқабатты үйлердің ішінара кірме жолдарын ағымдағы жөндеу үшін облыстық бюджеттен 310 миллион теңге бөлінді (71 мың шаршы метр, мемлекеттік сатып алу рәсімдері ұйымдастырылуда).
99 қиылыстағы жол белгілері мен бағдаршамдардың бағаналарын ауыстыру жұмыстары жүргізілді, – деді аймақ басшысы.
Баяндамасында облыс әкімі А. Мырзахметов аймақтағы «Цифрлық Қазақстан» бағдарламасының жүзеге асу барысы жайлы айтып өтті.
– Бағдарлама 11 бағыт бойынша 78 жоба ретінде жүзеге асырылуда (білім беру, денсаулық сақтау, инклюзивті қоғамдағы өмір, ТКШ, көлік, қауіпсіздік, бизнесті дамыту, АӨК, құрылыс, таза қаладағы өмір және қаланы басқару).
Облыс мектептері интернет желісіне 100 пайыз (446 мектеп) қосылған.Мектептерде «Bilimland» цифрлық білім беру қоры 100 пайызға, «Күнделік» электрондық журналы 98 пайызға енгізілген. Робототехника кабинеттерімен мектептерді жабдықтау, жоспарға сәйкес 50 пайызға жеткізіледі.
Облыста (5260 адам) медициналық қызметкерлер компьютерлермен 100 пайызға жабдықталған.
Тұрғындарға медициналық қызметтерді алу үшін «Мобильдік қосымша» құрылды (жыл соңына дейінгі жоспар – 30 пайыз).
Барлық орталық және аудандық ауруханаларда «Е-Kezеk» электрондық кезегі енгізілді.
«Ауыл – Ел бесігі» жобасына (Байзақ – Сарыкемер ауылы, Жамбыл –Аса ауылы, Шу – Төлеби ауылы) 3 миллиард теңге бөлінді.
108 жоба іске асырылуда. Жоба аясында Төлеби, Аса ауылдарында спорттық сауықтыру кешенінің және Төлеби ауылында мәдениет үйі мен аудандық емхана құрылысы басталып, 104 нысанға күрделі және ағымдағы жөндеу жұмыстары жүргізілуде, – деді Асқар Исабекұлы.
