Шикізат жеткілікті: Ауыл шаруашылығы министрлігі McDonald’s желісінің Қазақстан нарығынан кетуіне қатысты пікір білдірді

Ауыл шаруашылығы министрлігі McDonald’s желісінің өкілдері отандық өнімге ауысуға дайын болғанын мәлімдеді. Алайда компания стандарттарының енгізілуі ұзақ уақытты алған, деп хабарлайды Stan.kz ақпарат агенттігі.

Қазақстандық өндірушілер компания талаптарына сәйкес өндіріс бастауға дайын болған. Әрі 2023 жылдың бас кезіне кәсіпорында тексеріс жүргізу жоспарланыпты. Алайда McDonald’s жабылғандықтан тексеріс жүргізілмей қалған.

«Бұл компанияға шикізат немесе жартылай фабрикаттар жеткізушісі болу үшін арнайы сертификаттаудан өту керек, бұл бүкіл өндіріс тізбегіне қатаң және қымбат талаптар қойылатынын білдіреді: мал азығынан бастап қаптамаға дейінгі аралықты қамтиды. Бұл жағдайда компанияның белгілі бір жеткізушіні таңдайтынына кепілдік жоқ», – делінген министрлік хабарламасында.

Ауыл шаруашылығы министрлігі Қазақстан еттің барлық түрі бойынша ішкі нарықты толық көлемде қамтамасыз етіп отырғанын қосып өтті.

«Бүгінгі таңда ауыл шаруашылығы саласында шетелдік инвесторлардың қатысуымен жалпы құны 3,6 млрд доллар болатын 38 жоба іске асырылып, кейбірі пысықталып жатыр. Оның ішінде мал шаруашылығы саласында ет өндіру және өңдеу, өсімдік шаруашылығында қарқынды бақтар, модульдік жылыжай кешендері, томат пастасын өндіру және т.б. жобалар бар», – деп қосты ведомство өкілдері.

Еске салайық, бұған дейін McDonald’s жылдам тамақтану желісі Қазақстан нарығын кетуді жоспарлап отырғаны туралы хабарлаған едік. Кейін компания Қазақстандағы мейрамханаларын толығымен жабатынын ресми мәлімдеді.

https://stan.kz/shikizat-zhetkilikti-auil-sharuashiligi-ministrligi-mcd-375808/