Қазақстан Республикасының Бас Прокуратурасының бұйрығымен Оспанов Талғат Қыдыралыұлы Шу ауданының прокуроры лауазымына тағайындалды. Ауданның жаңа прокурорын облыс прокурорының орынбасары Б. Мухамеджан таныстырды. Кадрлық өзгеріске байланысты ұйымдастырылған жиынға аудандық сот төрағасы, аудандық полиция бөлімінің бастығы, аудан әкімінің орынбасарлары, мекеме, бөлім басшылары қатысты.
Жиында облыс прокурорының орынбасары Б.Мухамеджан қызметке тағайындау жөніндегі бұйрықпен және аудан прокурорының өмірбаянымен таныстырды. Әрі қарай Б.Мухамеджан сөз сөйлеп, жаңа қызметке кіріскен Талғат Қыдыралыұлына жауапкершілігі жоғары қызметте абыройлы болуына тілектестігін білдіріп, ауданда бірнеше жыл бойы прокурорлық қызметті абыроймен атқарған Қайыржан Қуатбековке алғыс айтып, алдағы қызметіне сәттілік тіледі.
Айта кету керек, Т.Оспанов 1986 жылы 27 мамырда Жамбыл облысы, Жамбыл ауданы, Аса ауылында дүниеге келген. 2008 жылы М.Х. Дулати атындағы Тараз мемлекеттік университетін тәмамдаған. Прокуратура органдарында 2012 жылдан бастап, Тараз қаласы прокурорының көмекшісі, аға көмекшісі, Жамбыл облысы прокуратурасының басқарма прокуроры, Тараз қаласы прокуратурасының бөлім бастығы, Жамбыл облысы прокуратурасының басқарма аға прокуроры, Мойынқұм ауданының прокуроры қызметтерін атқарған.
