«Швабрамен ұрып өлтірген»: Абай облысындағы түрмеде болған сұмдық туралы тың дерек шықты
Абай облысының соты 2025 жылдың сәуір айында колонияда болған қайғылы оқиғаға қатысты соңғы шешімін жариялады.
Түзеу мекемесінің тұрмыстық бөлмесінде екі сотталушы арасында туындаған жанжал соңы адам өлімімен аяқталған. Сот материалдарына сәйкес, кикілжіңге екі тараптың діни көзқарастары мен жеке араздықтары себеп болған.
Оқиға барысында жәбірленуші қарсыласын ұрып, жерге құлатқан. Алайда сотталушы бұған жауап ретінде ағаш швабраны қару ретінде қолданып, жәбірленушінің басы мен денесіне ауыр соққылар берген. Куәгерлер мен тергеу деректері шабуылдаушының қарсы тарап ес-түссіз жатқанда да соққыны тоқтатпағанын көрсетті. Ауыр жарақат алған сотталушы мекеменің медициналық пунктіне жеткізілгенімен, есін жимастан көз жұмды.
Тергеу және сот талқылауы кезінде қорғаушы тарап іс-әрекетті «өзін-өзі қорғау» немесе «абайсызда зиян келтіру» ретінде қайта саралауды сұраған болатын. Алайда сот бұл уәждерді негізсіз деп танып, айыпталушының іс-әрекетін қасақана кісі өлтіру (ҚР Қылмыстық кодексінің 99-бабы) деп бағалады. Арнайы тағайындалған сот-психиатриялық сараптамасы қылмыс жасалған сәтте сотталушының өз іс-әрекетіне толық жауап бере алатындай жағдайда болғанын дәлелдеді.
Сот үкімімен айыпты азаматқа жазалардың жиынтығы негізінде 11 жыл 6 ай мерзімге бас бостандығынан айыру жазасы тағайындалды. Ол жазасын қауіпсіздігі барынша жоғары түзеу мекемесінде өтейтін болады. Қазіргі таңда сот шешімі заңды күшіне енді.
