Шымкентте пәтерлердің бірінен бойжеткеннің мәйіті табылды. Жас қыз бірнеше жерінен пышақ жарақатын алған.
Қайтыс болған қыз 27 жаста болған, деп хабарлайды Экспресс К.
Шымкент қалалық Полиция департаментінің мәліметінше, 102 қызметіне «1-мамыр» көшесі бойында орналасқан көпқабатты үйлердің бірінің пәтерінен қыздың мәйіті табылғаны туралы хабарлама келіп түскен.
Абай аудандық полиция басқармасының бастығы Дәурен Майриховтың айтуынша, бұл қанды оқиғаға қатысы бар күдіктілер ұсталды.
«Аталған жайт Қылмыстық Кодексінің 99-бабы (Адам өлтіру) бойынша сотқа дейінгі тергеп-тексерудің бірыңғай тізіміне тіркелді. Іс бойынша сот-медициналық сараптама тағайындалды. Қазіргі уақытта тергеп-тексеру амалдары жүргізілуде. Жедел-іздестіру шаралары барысында Түркістан облысының 18 және 19 жастағы тұрғындары күдікті ретінде ұсталды. Олар уақытша ұстау изоляторына қамауға алынды»,-деді Дәурен Майрихов.
Еске салайық, өткен жылдың қараша айында Шымкентте дәл осындай екі оқиға болды. Экспресс К бұған дейін Республика даңғылы бойындағы жалдамалы пәтерден 23 жасар қыздың мәйіті табылғаны туралы жазды. Бірнеше пышақ жарақатын алған бойжеткен өліміне қатысы бар деген күдікпен 31 жастағы әйел ұсталды. Арада бес күн өткен соң тағы бір бойжеткеннің мәйіті жалдамалы пәтерден табылды.
