Шымкентте эпилепсиямен ауыратын балалардың ата-аналары шу шығарды. Өзге өңірлерде тегін беріліп жатқан тиімді дәрі-дәрмекті Шымкенттегі медицинаға жауапты шенеуніктер бермей жатыр дейді. Сондықтан қымбат препараттарды ай сайын шетелден алдыруға мәжбүр, деп хабарлайды Шаңырақ инфо Stan.kz ақпарат агенттігі “КТК” арнасына сілтеме жасап.
«Жезқазған, Алматы, Астана, тіпті Түркістан облысы, Жетісай алып отыр. «Сабрилды» алып отыр. Бағасы 80 мыңнан жоғары. Ал біздің ішетін дәрі 75 мыңға, оны Алматыдан алып отырмын. Түркияда 45 мың теңге тұрады екен», — дейді науқас баланың анасы Гүлмира Мұсабаева.
Науқас баланың денсаулығын қалыпты жағдайда ұстап отыру үшін дәрі алуға орта есеппен ай сайын отбасы бюджетінен 200 бен 300 мың теңгенің аралығында ақша кетеді екен. Сондықтан көпшілігі дүние-мүлкін сатып, микроқаржы ұйымдарына қарыз болдық деп отыр. Ата-аналардың сөзінше, қояншық ауруына шалдыққан балалар саны Шымкентте мыңнан асып жығылады. Шенеуніктерге талай мәрте арызданса да, түк нәтиже шығара алмапты.
Шу шығарған ата-аналарды Шымкенттің бас дәрігері «Нұр Отан» партиясының ғимаратында қабылдады. Оның айтуынша, науқастар дәрі-дәрмектің 20-дан астам түрін тегін алып жатыр. Ал ата-аналары талап еткен препараттар Қазақстанда тіркеуден өтпеген дейді. Сонда да министрлікке хат жазып, болмаса демеушілер тартып, мәселені бірер айда шешуге тырысамыз деп уәде берді.
«Ауыратын науқастарға бұл дәріні біз денсаулық сақтау министрлігіне хат жазып тіркеуден туін тездету және де егер өтпеген жағдайда онда бірреттік жолмен Қазақстан Республикасына кіргізу жұмысын істейміз. Алайда барлық ата-ана қазіргі таңда эпилепсияға қарсы дәрі-дәрмектің барлығын емханалардан еш проблемасыз алып жүр», — дейді Шымкент қаласы денсаулық сақтау басқармасының басшысы Бақытжан Позилов.
