Ел таңдауы алдымен елдің мұң-мұқтажын бес саусағындай білетін адамға түсетіні белгілі ғой. Ауыл әкімін ауылдықтардың өздері сайлай алатын күн де жетті. “Ауылдың басы болмасам да, сайының тасы болайын” деген ұстанымға байланған маған туған ауылымның тізгінін ұстау бұйырғаны — үлкен абырой.
«Жас келсе іске» демекші жастық жігерімді ауылдың өркендеуіне жаратпаққа бекінген жайым бар. Күнделікті күйбеңі еңбекпенен астасқан ауылымызды қалай дәріптесек те жарасымды. Мемлекеттің күретамырына қан жүгірткен ел бесігін ажарлы етуге бағытталған тірліктердің өзі біршама. Ауылдағы ағайындар тиімді бағдарламалардың арқасында шаруасын дөңгелетіп, ауылдың әрі кіріп келеді.
Өздеріңізге белгілі, 2019 жылы Үкімет отырысында Жамбыл облысының тұрғындарының тұрмыстық табысын жақсарту бойынша пилоттық жоба іске асырыла бастаған болатын. Содан бері облыс тұрғындарының тұрмыстық табысын жақсарту мақсатында Шу ауданына қарасты Жаңақоғам ауылдық округінде қолға алынған жобаның пилоттық кезеңі бүгінде нақты жүзеге асуда.
Бірлікке байланған берекелі ауылымда «бір жағадан бас, бір жеңнен қол шығаруға дайын ер азаматтар да баршылық. Қай ауылға барсақ та «біздерде мынадай бар, мынадай бар» деп барын асырып, жоғын жасырып жатады. Ауылдықтар шағын кәсіпкерлікті дамытуды жолға қойып, ел игілігіне жарайтын нысандар ашуда. Жанымызға керектің барлығы ауылдан-ақ табылып жатады, ауданға жиі ат сабылтпаймыз.
Біткен іске тоқмейілсу-бізге сын. Бастысы-бағытымыз айқын. Алдағы жылдарға құрған жоспарларымыз ретімен іске асатын болады. Жан жадыратар жақсы іске мұрындық болуға бекініп отырған жайымыз бар. Ордалы елдің отыз жылдығында оңды істерге бет бұрған мемлекетіміздің бесігі саналатын ауылдарда қамал алар қырық жылдыққа дейін қыруар тірлік атқарылады деп бек сенемін!
Медет РАХЫМБАЕВ,
Жаңақоғам ауылдық округінің әкімі.
