Бүгін Сарысу ауданы, Түркістан ауылдық округінің тұрғындары ауыл әкімін сайлайды. Округте 690 сайлаушы бар.
Ауылдық округке қарасты Ә.Бүркітбаев, Арыстанды және Үшбас ауылдары кіреді.
Сайлау №386 және №387 сайлау учаскелерінде жергілікті уақытпен сағат 07:00-де мемлекеттік әнұранмен басталды.
Ә.Бүркітбаев ауылы, М.Әуезов орта мектебінде орналасқан сайлау учаскесінде алғаш болып дауыс берген ауыл тұрғыны Дүтбаев Мейрамханға арнайы сый-сияпат жасалды.![]()
АУЫЛ ТҰРҒЫНДАРЫ САЙЛАУҒА БЕЛСЕНЕ ҚАТЫСЫП ЖАТЫР
Бүгін Түркістан ауылдық округінің тұрғындары ауыл әкімі сайлауынан таңсәріден бері белсенділік танытуда.
Алғашқылардың бірі болып Серкебаев Боранбай Әбілдаұлы сайлау учаскесіне келіп, өз таңдауын жасады. Өз сөзінде: — түркістандықтар ауыл әкімін таңдайды. Маңызды сайлауда «Бір жеңнен қол, бір жағадан бас» болып бірлігімізді танытуымыз қажет. Сондықтан, барлықтарыңызды бірлікте болуға шақырамын, — деді сайлаушы.
АУЫЛ ЖАСТАРЫ ӨЗ ТАҢДАУЫН ЖАСАДЫ
Бүгін Түркістан ауылдық округінде ауыл әкімінің сайлауы өтіп жатыр.
Сайлауға аға буын өкілдерімен қатар, жастар да қатысуда.
Арыстанды ауылындағы ең жас сайлаушы, 18 жасар Амоева Берибан дауыс беру учаскесіне келіп, өз таңдауын жасады.
Өзінің алғашқы сайлауына қатысып жатқанын, барлық жастарды ауыл әкімін таңдауда белсенділік танытуға шақырды: — Мен алғаш рет дауыс беру учаскесіне келіп, өз таңдауымды жасап жатырмын. Бұл мен үшін тарихи оқиға болып саналады. Іскер басшыны таңдауда ауыл жастары жұмылған жұдырықтай бірлікте болатынына сенімім мол, — деді.
АРЫСТАНДЫҚТАР САЙЛАУҒА БЕЛСЕНДІЛІК ТАНЫТУДА
Бүгін Түркістан ауылдық округі ауыл әкімінің сайлауы жоғары деңгейде өтіп жатыр.
Арыстанды ауылының тұрғыны, Мейірбекова Рәбиға алғаш болып, Арыстанды орта мектебінде орналасқан №387 сайлау учаскесіне келіп, өз таңдауын жасады: — Ауылдың ажарын айшықтау үшін тұрғындар саяси науқандарға, қоғамдағы оқиғаларға үн қосуы керек. Әрдайым бірлігіміз бекем, еліміз аман болсын, — деді.![]()
ҚАРТ САЙЛАУШЫ ЕЛГЕ АМАНДЫҚ ТІЛЕДІ.
Түркістан ауылдық округі әкімінің сайлауы жоғары деңгейде өтуде. Келушілердің саны сәт санап артып келеді.
Ә.Бүркітбаев ауылында орналасқан №386 сайлау учаскесіне келіп, өз таңдауын жасаған ең қарт сайлаушы, ауданымыздың құрметті ащаматы 85 жастағы Бимбетов Совет атамыз аймақты ел білетін, жерді білетін көшбасшы басқару керек деп есептейді. Сол себепті барлық ауыл тұрғындарын сайлауда бей — жай қалмай, таңдауларын жасауға шақырды.
Округ тұрғындарының белсенділігі жоғары
Бұқараның билікке деген сенімін арттыратын ауыл әкімінің сайлауын ел болып қолдап жатыр. Ауыл халқының өз әкімін сайлауы болашақ әкім үшін де, халық үшін де жаңа белес.
Сонымен қатар, сайлауға ауылдық ардагерлер кеңесінің мүшелері, еңбек ардагерлері келіп дауыс берді.
БІР ШАҢЫРАҚ АСТЫНДА
Түркістан ауылдық округі өзге ұлт өкілдерінің жарасым тапқан құтты мекені. Мұнда әсіресе күрд ұлтының тұрғындары бір шаңырақ астында тату — тәтті ғұмыр кешіп келеді.
Бүгін өтіп жатқан Түркістан ауылдық округі әкімінің сайлауында өзге ұлт өкілдері саяси оқиғаның салмағын сезініп, сайлауға бір кісідей атсалысуда:
Барбанг күрді этно мәдени жетекшісі Сайран Айдарова: — Тіліміз бөлек болғанымызбен, тілегіміз бір, жүрегіміз бір. Ауылымыздың көркеюіне жақсы әкімге, адал басшыға байланысты. Осынау маңызды сайлауда бірліктің үлгісін танытуымыз керек, — деді.
ҮЙ ЖАҒДАЙЫНДА ДАУЫС БЕРГЕН ҚАРТ САЙЛАУШЫЛАР
Cайлау күні Түркістан ауылдық округіне қарасты Арыстанды ауылында қарт сайлаушылар үшін ауылдық округі әкімі сайлауына дауыс беру мүмкіндігі үй жағдайында өтті.
Жауапты мамандар сайлауға бара алмаған азаматтарға сайлау жәшігін мекенжайлары бойынша жеткізу қызметін қарастырды.
САЙЛАУ ӨЗ МӘРЕСІНЕ ЖЕТТІ
Түркістан ауылдық округі әкімі сайлауы бойынша барлық сайлау учаскелерінде дауыс беру ресми түрде аяқталды.
