Румынияда ел тарихындағы ең ірі киберқылмыс тіркелді. Тыргу-Жиу түрмесінде отырған бірнеше тұтқын түрме жүйесінің ақпарат базасын бұзып, өз жазасын қысқартып, есепшоттарындағы ақшаны өзгертумен айналысқан
Бәрі де кездейсоқ анықталған. Қаржы бөлімінің қызметкері тұтқындардың онлайн сатып алу жасай бастағанын, бірақ олардың есепшотындағы қаражат азаймағанын байқайды. Осыдан кейін түрме әкімшілігі бүкіл жүйені тексеріп, жазаны жеңілдету мен қаржы аударымдарына қатысты ондаған бұрмалау деректерін анықтады.
Тергеу барысында бұл істің артында киберқылмыс үшін сотталған, өзін Anonymous хакерлік ұйымының мүшесі деп таныстырған адам тұрғаны белгілі болды.
Ол 2025 жылдың шілдесінде басқа мекемеге уақытша ауыстырылған кезде жүйе әкімшісінің логині мен паролін байқап қалған. Кейін Тыргу-Жиуге оралған соң, түрме ішіндегі ақпарат киоскілері арқылы жүйеге кірген.
Осылайша ол және серіктері үш ай бойы IMSweb деп аталатын ұлттық ақпараттық платформаны бақылауға алып, тұтқындарға арналған деректерді өз қалауынша өзгертіп отырған.
Тергеу дерегінше, хакерлер үш ай ішінде 300 сағаттан астам уақыт бойы жүйеге кірген. Олар өз жазасын қысқартып, “еңбекпен өтелген күндер” қосқан; ақша қалдығын көбейтіп, онлайн дүкендерде сауда жасаған; камераларды өзгерткен; рұқсат етілмеген жеке кездесулер тіркеген.
Румынияның Ұлттық түрме әкімшілігі (ANP) оқиғаны растады және “жүйе дереу оқшауланып, кінәлілер анықталып жатыр” деп мәлімдеді.
Белгілі болғандай, бұзылған IMSweb жүйесі 2023 жылы Еуропалық одақтың 1 млн еуро гранты есебіненен іске қосылған. Алайда кәсіподақ деректеріне сүйенсек, жоба асығыс іске қосылып, қауіпсіздік хаттамалары толық пысықталмаған.
https://turkystan.kz/article/269539-turmedegi-kiberqylmys-tutqyndar-zuieni-buzyp-zazalaryn-qysqartyp-algan
