Қасым-Жомарт Тоқаев Мемлекет басшысының ешбір партияға басымдық бермегені жөн, яғни саяси тұрғыдан бейтарап болуы қажет екенін баса айтты бүгін «Amanat» партиясының кезектен тыс съезінде сөйлеген сөзінде.
«Бұл – менің айқын ұстанымым», – деп нақтылады ол.
Мұндай қағида саяси жүйеде әділдіктің орнауына, барлығы үшін тең мүмкіндіктің туындауына жол ашады. Атқарушы билікке тәуелсіз партияға халықтың сенімі нығаяды.
Президенттің мәлімдеуінше, бұл елімізде жаңа партиялардың пайда болуына ықпалын тигізеді. Ал жұмыс істеп тұрған партиялар өз қызметтерін азаматтардың өзекті талаптарына сәйкес қайта қарастырып, қайта құра бастайды. Жолдауда Президент бастамашы болған реформаларға орай Конституцияға енгізілетін бірқатар түзетулер партиялардың елдегі рөлі мен ықпалын күшейтуге, сайлаушыларының сенім үддесін барынша ақтау үшін олардың өзара бәсекелестігін арттыруға бағытталған.
Қазірдің өзінде Қазақстанда партиялардың өз ісін белсендіре бастағанын байқауға болады. Соның бір мысалы, «Adal» партиясының «Amanat» партиясына қосылуға ниет білдіруі болды.
Ринат Нуракбаев
Жамбыл облыстық Рухани жаңғыру жобалық офисінің Басшысы
