«ТӘУЕЛСІЗДІККЕ 30 ЖЫЛ» АЛЛЕЯСЫ АШЫЛДЫ
Тәуелсіздіктің 30 жылдығына орай, байтақ елімізде мыңдаған істер атқарылып, жұрт қуанышын еселегені мәлім. Дәл осы мерейлі кезеңнен тыс қалмаған Түймекент орта мектебінің ұжымы білім беру мекемесінің ауласынан «Тәуелсіздікке 30 жыл» аллеясын ашты.
Аталмыш аллеяның ашылу рәсіміне облыс пен ауданнан арнайы қонақтар шақырылып, ауыл ақсақалдары мен ауылдық округ әкімі, мектеп түлектері және мұғалімдер қатысты. Сәні мен салтанаты келіскен аллеяның жалпы аумағы 360 шаршы метрді құрайды. Онда «Қазақстан Тәуелсіздігіне 30 жыл» деген тақырыптағы мазмұнды көрнекті сөз менмұндалап тұр. Айналасына абаттандыру жұмыстары жүргізіліп, жарық шамдары орнатылыпты. Аллеяға келушілерге ыңғайлы етіп орындықтар да қойылған. Осынау көпке үлгі боларлық игі іске қолдау көрсетіп, демеушілік жасаған мектеп түлектері Шайзат Әліпбаев, Нартай Әтеев, Бексұлтан Отыншиев, Жасұзақ Исабеков, Мұрат Мәлікбайұлы, Ерболат Мұқашев, Ернұр Исаев, Ғабит Мамыров, Еркебұлан Шайыпов болса, ондағы жұмыстарға мектептің даму пәнінің мұғалімдері атсалысқан.
Шараның салтанатты ашылу рәсімінде аудан әкімінің орынбасары Дәуір Дәулетов, облыс әкімдігі мәдениет, архивтер және құжаттама басқармасының Шерхан Мұртаза атындағы «Руханият және тарихтану» орталығының директоры Сауран Қалиев, Түймекент орта мектебі қамқоршылық кеңесінің төрағасы Әзімхан Биназаров жүрекжарды жылы лебіздерін білдіріп, айтулы шараға атсалысқан мектеп түлектері мен ұстаздар қауымына ризашылықтарын жеткізді.
Жаңа нысанның лентасын аудан әкімінің орынбасары Дәуір Дәулетов, аудандық ардагерлер кеңесінің төрағасы Серік Ермеков, Түймекент ауылдық округі ардагерлер кеңесінің мүшесі Мұхамедәлі Халилаев қиып, ақ жаулықта аналар шашу шашты.
Байтерек Бәйтерек и ещё 8
