Жамбыл облысы әкімдігі денсаулық сақтау басқармасы басшысының Асет Қалиевтің 30.03.2022 жылғы №65 бұйрығымен Жамбыл облыстық патологиялық анатомия бюросының басшысы болып Әлқуатов Нұртуған Айтуғанұлы тағайындалды.
Әлқуатов Нұртуған Айтуғанұлы 1981 жылы 9 қарашада Қызылорда облысы, Байқоңыр қаласында дүниеге келген.
1998 мектепті үздік аяқтағаннан кейін Ақтөбе мемлекеттік медицина институтына оқуға түседі. 2004 жылы М.Оспанов атындағы Батыс Қазақстан мемлекеттік медицина университетінің педатрия факультетін тәмамдап, 2005 жылы балалар хирургиясы бойынша интернатурадан өткен.
Еңбек жолын 2005 жылдың тамыз айында Тараз қаласындағы облыстық балалар ауруханасында дәрігер-ординатор, балалар хирургы ретінде бастаған. 2007 жылдан бастап облыстық балалар ауруханасында УДЗ дәрігері және 2010 жылдан бастап эндоскопист дәрігері қызметін қоса атқарды. 2011 жылдың 28 желтоқсаннан бастап бүгінгі күнге дейін Жамбыл облысының штаттан тыс бас неонаталды хирургі.
2012-2014 жылдары М. Х. Дулати атындағы Тараз мемлекеттік университетін «Менеджмент» мамандығы бойынша бітірген.
2013-2015 жылдары аралығында Жамбыл облыстық балалар ауруханасы жанындағы «Балалар амбулаториялық хирургия орталығы», «Функционалды диагностика» бөлімшелерінің және күндізгі стационар меңгерушісі қызметтерін атқарған.
2015-2017 жылдар аралығында Жамбыл облыстық консультативтік-диагностикалық медицина орталығы бас дәрігерінің орынбасары, 2017-2022 жылдары «Almaz Medical Group» ЖШС бас дәрігері болған.
2021 жылы ҚР Президентінің «Халық алғысы» медалімен марапатталған.
Жамбыл облысы әкімдігі денсаулық сақтау басқармасының
баспасөз қызметі
