https://www.instagram.com/p/DMLjW14MAT_/?igsh=Zzl1OTR4OWpzeWZs&img_index=3
Талас аудандық орталық ауруханасының ғимараты алдағы уақытта кеңейтіліп, толықтай қайта жаңғыртылады. Бұл – медициналық қызмет сапасын арттыруға бағытталған маңызды қадам.
«Талас аудандық орталық көпбейінді ауруханасының 200 төсектік ғимаратын кеңейте отырып қайта жаңғырту» жобасы бойынша нақты жұмыстар қолға алынған.
Аталған жоба шеңберінде аурухананың негізгі ғимаратымен қатар бірқатар маңызды нысандарға да күрделі жөндеу жүргізіледі. Олар: инфекциялық бөлімше, ас даярлау блогы, шаруашылық бөлмелері, жедел жәрдем станциясы, мәйітхана және әкімшілік корпусы. Бұл нысандар қазіргі заман талаптарына сай жаңартылып, қызмет көрсету деңгейі айтарлықтай жақсартылмақ.
Күрделі жөндеу және қайта жаңғырту жұмыстарын жүргізу үшін «Экависмут» жауапкершілігі шектеулі серіктестігімен 2022 жылғы 10 тамызда №249 келісімшарт жасалған. Осы келісім аясында жобалық-сметалық құжаттамалар дайындалып, мемлекеттік сараптамадан оң қорытынды алынған. Бұл – жобаны іске асыруға құқықтық және техникалық тұрғыдан толық мүмкіндік бар екенін білдіреді.
Қазіргі уақытта құрылыс жұмыстарына дайындық жүргізіліп жатыр. Осыған байланысты облыстық денсаулық сақтау басқармасының басшысы Сержан Назарбек арнайы іссапармен Талас ауданына келіп, құрылыс нысанын аралап шықты. Басқарма басшысы жергілікті құрылыс басқармасы өкілдерімен бірге ғимараттарға жасалатын күрделі жөндеу жұмыстарының жобасын талқылап, нақты ұсыныстар мен тапсырмалар берді.
Бұл жоба жүзеге асқан жағдайда аудан тұрғындары үшін медициналық қызмет сапасы мен қолжетімділігі едәуір артып, заманауи талаптарға толық сәйкес келетін жаңа медициналық инфрақұрылым қалыптасады деп жоспарлануда.
