Талас ауданы, Ақкөл ауылында № 13 өрт сөндіру бекеті ашылды, ол өз жұмысын күрделі жөндеуден өтіп, қайта жабдықталған ескі гараж ғимаратында жүзеге асыратын болады. Айта кету керек, бұл Талас ауданында жұмыс істейтін екінші өрт сөндіру бекеті.
Жаңа өрт сөндіру бекетінің ашылу іс-шараларына Талас ауданының әкімі Қанатбек Мәдібек, Талас аудандық мәслихатының хатшысы Қадірбек Садубаев, Жамбыл облыстық Төтенше жағдайлар департаментінің бастығы, полковник Ермек Момбаев, Жамбыл облысы Төтенше жағдайлар Департаментінің Өрт сөндіру және авариялық құтқару қызметінің бастығы, азаматтық қорғау полковнигі Мансур Шаикрамов, Талас аудандық Төтенше жағдайлар бөлімінің бастығы, азаматтық қорғау подполковнигі Ғалымжан Сыздықов, Ақкөл ауылдық округінің әкімі Жандос Ратов, сондай-ақ, Ақкөл ауылының тұрғындары қатысты.
Өрт сөндіру бекеті 2267 адам тұратын Ақкөл ауылын және жақын орналасқан ауылдық округтерін де өртке қарсы қорғауды қамтамасыз етеді. Өрт сөндіру бекетінің жұмыс істеуі тәулік бойы және жыл бойы жүзеге асырылатын болады, онда қызметті ауысым бойын¬ша 11 адам 2 арнайы өрт сөндіру (Зил, Камаз) техникаларымен атқаратын болады.
Өрт сөндіру бекетінің жеке құрамына жұмыс істеу үшін барлық жағдайлар жасалған.Өрт сөндіру бекетінің ашылуы ауылдық округтер мен жалпы аудан тұрғындары үшін техногендік және табиғи сипаттағы төтенше жағдайлардан қауіпсіздіктің ұзақ мерзімді кепілі болатыны сөзсіз.
Талас ауданы әкімдігінің баспасөз қызметі