Талдықорған қаласындағы жаппай тәртіпсіздік кезінде қайтыс болған сарбаз Айбат Амановтың казармадағы жатын орны енді тарихи жәдігер болып сақталады.
Ол жерге енді басқа сарбаздар жатқызылмайды. Марқұмның төсек орны саф алтындай сақталады. Бұл жайлы Талдықорған қаласының тұрғыны Думан Қырықбаев мәлімет берді.
5514 әскери бөлімінің казармасындағы жатын бөлмеде 20 шақты сарбазға арналған төсек орын бар. Тек марқұм Айбат Амановтың ғана орны бос тұрады. Мұндай естелік Отан алдындағы борышын өтеуге келген әрбір сарбазға үлгі болатыны анық дейді тұрғын.
Айта кетейік, Ұлттық ұлан құрамында міндетін атқарған Айбат Аманов Талдықорғанда тәртіпсіздік болып жатқанда полиция ғимараты мен әкімдікті қорғау кезінде көз жұмды. Марқұм ІІІ дәрежелі «Айбын» орденімен наградталды.
