Облыста індет қайта өрши бастады. Әсіресе Тараз қаласындағы эпидемиологиялық жағдай мəз емес. Салдарынан облыс орталығы қазір «сары» аймаққа өтті. Алда-жалда өңір «қызыл» аймаққа енетін болса, оқушылар онлайн оқуға көшуі мүмкін. Сондықтан жұртшылық санитарлық талаптарды сақтап, мүдделі мекемелер індеттің таралуына қарсы шараларды күшейтіп, қоғам коронавирус инфекциясының ушығуына жол бермеуі керек.
Бұл туралы Өңірлік коммуникациялар қызметінің ақпарат алаңында «Эпидемиологиялық жағдай жəне коронавирустық инфекцияға қарсы вакцинация» тақырыбында өткен баспасөз мəслихатында айтылды.
Облыстық санитариялық-эпидемиологиялық бақылау департаменті басшысының орынбасары Бағлан Қыдырбаевтың сөзіне сүйенсек, індеттің «дельта» штамымен салыстырғанда «омикрон» салдарынан дімкəстердің өлім құшуы аз.
Бірақ оның таралу жылдамдығы «дельтамен» салыстырғанда анағұрлым қарқынды. Ел арасында бұл штамның жұқпалылығы «дельтаға» қарағанда 70 есе тез көбейеді екен. Індетті қайта жұқтыру қаупі де жоғары.
– Соңғы аптада елімізде коронавирус инфекциясымен ауырғандар саны айтарлықтай өсті. Соңғы күндері анықталғандай індет жұқтырғандар санының екі есеге өсуі байқалады. Эпиджағдайдың күрт нашарлауы «омикрон» штамының анықталуымен байланысты. Елімізде коронавирус ауруы соңғы екі аптада 41 пайызға өсті.
Жыл басынан бері облыста COVID-19-дың 399 жағдайы тіркелді. Өткен тəулікте тіркелгені – 104 дерек. Оның ішінде 98-і үйде инфекцияның таралу ошағы болса, 6 жұмысшы, 203 байланыста болған тұлға анықталды. Аумақтық ПТР тесті нəтижесі бойынша Тараз қаласында – 79, Байзақ ауданында – 9, Жамбылда – 7, Қордайда – 6, Таласта – 1, Шу ауданында – 2 адам індет жұқтырғаны белгілі болды.
Инфекциядан қорғаудың тиімді əдістерінің бірі – коронавирустық инфекцияға қарсы вакцинацияның толық курсы жəне кейінгі ревакцинация. Жаңа штамдардың таралуын болдырмау үшін ұжымдық иммунитеттің қажетті деңгейіне жету маңызды. Коронавирустық инфекцияға қарсы вакциналар қауіпсіздіктің жоғары деңгейіне ие, ауыр жағдайларды, аурухана төсегіне таңылуды азайтады жəне коронавирустық инфекциялардың өлімін болдырмауға ықпал етеді. Өткен жылдың ақпан айынан бастап облыста екпенің бірінші компонентін 18 жастан асқан 633 244 адам (100,3 пайыз) алды. Екінші компонентпен 563 464 тұрғын (89,3 пайыз) қамтылды, – деген Бағлан Жарылқасынұлы ревакцинация жəне мақсатты топтарды «Pfizer» препаратымен иммундау тұрғысында атқарылып жатқан шаруаларға да егжей-тегжейлі тоқталды.
Бүгінгі таңда 27 951 адам «Комирнати» вакцинасын алыпты. Оның ішінде 23 291-і 12-17 жасқа дейінгі жасөспірім болса, 1 773-і жүкті, 2 887-і бала емізетін əйелдер.
Популяциялық иммунитетті қалыптастыру үшін өңір тұрғындарының кемінде 60-70 пайызы екпемен қамтылуы тиіс.
