2022 жылдың 27 қаңтарында Жамбыл облысы ТЖД Өрт сөндіру қызметінің мәжіліс залында Қазақстан Халық партиясының Жамбыл облыстық филиалының қызметкерлерімен санитарлық талаптарды сақтай отырып, дөңгелек үстел ұйымдастырылды. Аталған шараға Тараз қалалық Төтенше жағдайлар басқармасы мен Өрт сөндіру мекемесінің қызметкерлері қатысты. Жалпы аталған дөңгелек үстел іс-шарасы «Көпқабатты және жеке сектордағы тұрғын үйлердің өрт қауіпсіздік» профилактикалық жұмыстары тақырыбындағы қоғамдық пікір алмасу сипатында өткізілді. Тараз қаласы ТЖБ бастығы, азаматтық қорғау полковнигі Әскер Сексенқалиұлы Сарбатов Тараз қаласы бойынша өрт және түрлі сипаттағы төтенше жағдайлардың алдын алу бойынша атқарылған іс-шаралар жөнінде баяндама оқыды. Одан әрі биылғы жылы осы бағытта атқарылуы жоспарланған іс-шараларды тілге тиек етті.
Айта кеткен жөн, Қазақстан Халық партиясының өкілдері шара барысында тек өрттің алдын алу бағыты бойынша ғана емес, сонымен қатар өрт сөндіруші-құтқарушылардың күнделікті тыныс тіршілігімен және түрлі сипаттағы өрт сөндіру-құтқару техникаларымен жан-жақты танысты.
Тараз қаласы Төтенше жағдайлар басқармасы
