Таразда 2704 оқушы бітірсе, оның 87-сі «Алтын белгі», 112-сі «Үздік аттестат» үміткерлері

Биылғы жылы халықаралық, республикалық олимпиадалар мен ғылыми жарыстарда Тараз қаласының 37 оқушысы жүлделі орындар алды. Оның ішінде 3 оқушы Халықаралық ғылыми жоба жарысында жүлдегер атанды.

Шәкірттеріне терең білім беріп, жоғарыда аталған оң нәтижелерге қол жеткізген ұстаздарға біздің ризашылығымыз шексіз.

Құрметті мектеп түлектері!

Сіздер бүгін мектеппен қоштасып, үлкен өмірге жолдама алғалы тұрсыздар. Мемлекетіміз тәрбие мен білім беру ісіне ерекше назар аударып, Сіздердің сапалы білім алып, үлкен азамат болуларыңыз үшін барынша жағдай жасап отыр.

Елдің қуаты мен қозғаушы күші — Сіздерсіздер.

Алда үлкен сын күтіп тұр. Барлықтарыңа Ұлттық Бірыңғай тестілеуден абыроймен өтіп, Қазақстанымыздың білікті маманы атануларыңа тілектеспін.

Ал мектептегі алғашқы жылдарын сәтті аяқтап, бірінші сыныптан екіншіге аяқ басқан жас бүлдіршіндер мен барлық мектеп оқушыларына жазғы демалыстарын жақсы өткізіп, күш жинап, жайдары көңіл күймен жаңа оқу жылына оралыңдар демекпін.