Таразда биыл Наурыз жан-жақты тойлануда. Күн райының суығына қарамастан қаланың 11 округінде Жаңа жылды қарсы алуда. Әсіресе, көпқабатты тұрғын үйлердің тұрғындары да белсенділік танытуда.
“Ырыс мол болсын” күні аясында “Grand bazar” сауда орталығында ауыл шаруашылығы өнімдерінің жәрмеңкесі өтті. Таң сәріден мұнда келушілердің қатары көп болды. Өйткені, кәсіпкерлер өз өнімдерін ешқандай делдалсыз, сауда орталықтарынан әлдеқайда төмендетілген бағада сатты. Сондай-ақ, келушілерге Наурыз көже таратылып, ұлттық ойындардан жарыс өтті.
Әйтеке би көшесі нөмері 30 үйдің тұрғындары аулаларына ақ дастархан жайып, алдымен құран бағыштатты. Көпшіліктің қуанышымен бөлісуге қала әкімі арнайы барып, тұрғындарды Ұлыстың ұлы күнімен құттықтады. Өз аулаларын күтіп-баптап, ауызбіршілікті сақтап келе жатқандары үшін алғысын білдірді. Қазақтың дәстүріне сай Тұсаукесер рәсіміне қатысты.
“Кірпіш зауыты” алқабының тұрғындары болса 60 орта мектепте бас қосып, ұлық мерекені атап өтті. Кең дастархан жайылып, ауылдастар ұлттық ойындардан жарыс өткізіп, өнерлерін паш етті.
Сонымен қатар “Тектұрмас” алқабының тұрғындары да түгелдей жиналып, қазақы жыл басын, жақсы ниет, шат-шадыман көңілмен қарсы алуда. Дәл осындай мерекелік басқосу шаһардың әр аумағында 22-наурызға дейін көрініс табады. Халықтың жеке ұсыныстары негізінде мөлтек аудандарда, Рысбек батыр көшесінде, ал, 22-наурыз қаладан шалғай орналасқан аумақтар мен “Арай” иінінде өтеді.
Іс-шара аясында қайырымдылық акциялары, тал егу, ұлттық ойындар, спорттық жарыстар және мерекелік концерттер ұйымдастырылмақ.
Наурыз — жыл басы ғана емес, жақсылықтың жаршысы, тіршіліктің бастау көзі. Осы ретте бірлігі жарасқан тараздықтар еліміз тыныш болып, береке арта берсін деген ортақ пайымда.
Тараз қаласы әкімдігі
