Бүгін «AMANAT» партиясы Шу аудандық филиалының ұйымдастыруымен дәстүрлі «Таза бейсенбі» экологиялық акциясы өтті.
Іс-шара Мемлекет басшысы Қасым-Жомарт Тоқаевтың бастамасымен жүзеге асырылып жатқан «Таза Қазақстан» республикалық акциясы және 10 шілде – Балықшылар күніне орай ұйымдастырылды. Акция аясында Төле би ауылындағы халық жиі демалатын Шу өзенінің бойында тазалық жұмыстары жүргізілді.
Экологиялық шараға партия аудандық филиалының төрағасы Болатхан Ниязбеков, аудандық мәслихат депутаты, фракция мүшесі Ғани Қойбағаров, мемлекеттік және қоғамдық ұйым өкілдері, партия мүшелері мен «БАЛЫҚ FEST SHU» ҚБ мүшелері белсене қатысты.
– «Таза бейсенбі» акциясы аясында бүгін Төле би ауылындағы Шу өзенінің жағалауында ауқымды тазалық жұмыстары жүргізілді. Бұл шараның басты мақсаты – тек қоқыс жинау емес, қоғамда экологиялық мәдениетті қалыптастыру, табиғатқа жанашырлықпен қарауға үндеу. Бүгінгі акцияға қатысқан белсенді азаматтарға алғысымды білдіремін. «AMANAT» партиясы табиғатты қорғау ісін өзінің басым бағыттарының бірі деп санайды. Алдағы уақытта да мұндай игі бастамалар тұрақты жалғасын табады. Туған жеріміздің тазалығы – өз қолымызда, – дейді партия Шу аудандық филиалының төрағасы Болатхан Ниязбеков.
«AMANAT» партиясы бұл бастаманы қоршаған ортаны қорғау, экологиялық мәдениетті қалыптастыру және туған жерге жанашырлықты арттыру жолындағы маңызды қадам деп санайды. Бұл – азаматтық жауапкершіліктің көрінісі әрі болашақ ұрпаққа үлгі болатын игі іс. Барша тұрғындарды осындай экологиялық акцияларға белсенді қатысуға шақырамыз.
