Тараз қаласына тиіп тұрған Шайқорық ауылы ертеден келе жатқан елді мекеннің бірі. 1929 жылдан бастап ұжымшар ретінде шаруашылыққа бет бұрған ауыл одан кейін бірнеше жыл «Бесжылдық» ұжымшарының құрамында болыпты. 1961 жылы «Жамбыл жеміс-жүзім кеңшары» болып қайта құрылған. Осы кезден бастап кеңшардың тасы өрге домалап, шаруашылқтың аяқ алысы кеңге қанат жайды.
Алайда тәуелсіздіктің елең-алаң шағындағы қаржылық дағдарыс зардабын өзге елді мекнедер секілді бұл ауылда тартқан еді. Қиындыққа төзудің басты шарты еңбекте жатқанын білетін тұрғындардың бірі қала жақтан ырзығын айырса, кейбірі маңайдағы пияз, картоп, қызанақ секілді тағы да басқа көкөніс егілген алқаптарда жалданып еңбек етті. Кеңшар ісі келмеске кеткенімен, соның негізінде құрылған «Шербет» жауапкершілігі шектеулі серіктестігі секілді өзге де бірқатар жаңадан құрылған шаруа қожалықтар жұрттың жұмыспен қамтылуына сеп болды. Сол кездері Талас, Сарысу секілді төменде жатқан аудандардың шалғайда орналасқан елді мекендерінен қалаға қарай шұбырған көштің кейбірі осында тоқтады. Олардың дені осы ауылдан қоныс тебу үшін жер телімін алып, үй салды. Соның есебінен ауыл аумағы ұлғайып, тұрғындар саны арта түсті. Мұнда қазір 640 түтін бар.
Құрамында Шайқорық, Шайқорық стансасы, Бесжылдық, Танта, Қапал, Қоңыртөбе секілді алты ауылы бар Жамыл ауылдық округінің орталығы осы Шайқорық ауылы. Округ аумағында жалпы 7222 тұрғын бар болса, оның 1500-ге жуық өзге этностар. Ауыл әкімі Бақыт Садырбаев 85 мың 480 тұрғыны бар Жамбыл ауданы өзге ұлт өкілдері көп шоғырланған өңір ретінде саналаатынын, ауданда 23 мың 652 өзге ұлт өкілдері бар болса, оның 3600-ге жуығы түрік екенін, түріктердің 1920-ға жуығы аталған ауылдық округте тату-татті тұрмыс кешіп жатқанын айтты.
– Біздің тәуелсіз мемлекетіміздің ең негізгі құндылығы – қазақстандықтардың ынтымағы мен бірлігі. Әлемге қауіпсіз аймақ ретінде танылуымызға мемлекетіміз ұстанған саясатың ешкімді ұлтына қарап алаламай, кез келген азаматтың тең дәрежеде өмір сүруіне кепілдік беруі сеп болып отыр. Бұл қазақ елінің іргесі сөгілмей, мемлекетіміздің мығым, ұлтымыздың тұтастығына арқау болып отыр. Ауылдық округ аумағында қазір 12 түлі этнос өмір сүріп жатса, соның ішінде кәріс, өзбек, неміс секілді он түрлі ұлт осы Шайқорық ауылында тұрады. Тұрғындардың жалпы саны 3773-ті құраса, оның 2693-і қазақтар, қалғанын өзге ұлт өкілдері. Өзге этностардың дені түріктер, олардың саны – 822. Татулық пен достығы, бірлігімен берекесі жарасым тапқан елдің ішкі тұрақтылығы нығайып қана қоймай, экономикалық-әлеуметтік жағдайы да жақсаратыны сөзсіз. Оған осы Шайқорық ауылының тыныс-тіршілігі, ұлттардың жарасымды бірлігі дәлел бола алады. Ауыл тұрғындары еңбекқор. Мұндағы 31 жеке кәсіпкерліктің тоғызы дүкен болса, біреуі 2 литрлік шыны өнімін (банка) шығарады. Тағы бірінің бүгінгі заман талабына сай өз үйлерінен ашқан шағын цехтары бар. Осы тектес әртүрлі бағытта 24 кәсіпкерлік нысан жұмыс істеп тұр. Шаруа қожалықтардың саны – 80. Оның тоғызы мал шаруашылығымен айналысса, қалғаны ырзығын егін шаруашылығы арқылы тауып отыр. Ауылда Шайқорық орта мектебі, «Ақбота» балабақшасы, «Сәуле» шағын орталығы, Шайқорық дәрігерлік амбулаториясы, Бақытжан Тәшметов атындағы спорт кешені, «Орақбай» мейрамханасы, «Алтын бұлақ» демалыс орталығы, «Сауран» жекеменшік емханасы бар. Осының барлығы да тұрғындардың жұмыспен қамтылуына негіз болып отыр, – дейді Б.Садырбаев.
Мұнда суармалы жер 750 гектарды құрайды. Оның 26 гектарына күздік бидай, 200 гектарына жаздық арпа, 45 гектарына әртүрлі көкөніс, 60 гектарына алма ағашы, 5 гектарына жүзім егіліпті. Қалғаны мал азығы дақылдары. 20 гектарға жуық жайылымды жер бар екен. Жылқы, сиыр, қой-ешкі секілді төрт түліктің де жылдан-жылға саны көбею үстінде. Бірлігі жарасым тапқан ауылда айтарлықтай әлеуметтік мәселелер туындап тұрған жоқ. Көшелер шетінен жөнделіп, көбісі жарықтандырылған. Кез келген үй табиғи газ бен таза ауыз су тұтынып отыр. Биыл Д. Қонаев көшесін жөндеуге қазына қаржысынан 26 миллион 052 мың теңге, Ә. Ташметұлы көшесіне 16 миллион 399 мың, Алаш көшесіне 4 миллион 949 мың, Ынтымақ көшесіне 17 миллион 589 мың теңге қаражат бөлініпті. Шайқорық орта мектебінің аялдамасына дейін жарықтандыруға тағы да 536 мың теңге қаралыпты.
Ауылда ұлтаралық татулық бағытындағы жұмыстарды жандандыру мақсатында Шайқорық ауылдық «Ахыска» түрік этномәдени орталығы жұмыс істейді екен. Аталған қоғамдық бірлестіктің төрағасы Рамазан Музафаров қоғамдық келісіммен ұлтаралық ынтымақтастықты нығайту мақсатында түрлі іс-шаралар өткізіп, түрік халқының мәдениеті мен салт-дәстүрін насихаттап жүргенін тілге тиек етті
– Мұнда 170 үй түріктердің отбасы. Олар қазақ және басқа да әртүрлі ұлт өкілдерімен етене араласады. Жалпы, ауылдағы кез-келген ұлттың өзіндік салт-дәстүрі мен әдеп-ғұрпын насихаттауына, бір-бірінің ұлттық құндылықтарына құрметпен қарауына барынша жағдай жасалған. Бұған елімізде тұрақтылық және келісім моделін дамытуда айтарлықтай табыстарға қол жеткізуіміз, қазақстандық біртектілікті нығайту бағытында қолға алған шаралар арқау болып отыр. Мемлекет саясатында барлық ұлт пен ұлыстың салт-дәстүрлерін сақтауға, дәріптеп, дамытуға үлкен басымдық берілгенін осыдан-ақ аңғаруға болады. Мәселен, «Қазақстан – 2050» стратегиясында белгіленген міндеттерді жүзеге асыру аясында қолға алынған «Мәңгілік ел» жалпыұлттық идеясы ұлт пен ұлысты ортақ мүддеге жұмылдыра отырып, мемлекетімізді әлемдегі дамыған 30 елдің қатарына қосуға бастайды. Осы арқылы біз ұлы мақсат-мүддеден туындаған Мәңгілік ел болсақ деген арманымызға қол жеткізуге жақындап келеміз. Мұны арманы ортақ қазақстандықтардың бірге орындайтынына сенімдімін, – дейді Рамазан Фахриоглы.
Жалпы Шайқорық ауылындағы өзге этонстар өздерін осы ауылдың әу бастағы тұрғыны санайды. Десе де олар өз ата-бабаларының бір кездері заман зәуімен Қазақстанға жер аударылып келіп, осында тұрақтап қалғанын жақсы біледі. Сол бір аумалы-төкпелі, қияметтен кем емес зарлы заманда жаны жомарт, құшағы кең қазақтар өз отанынан пана таппаған жазықсыз жандарды жатсынбай, бауырына басып, дос тұтқанын ешқашан ұмытпайды. Өйткені, бүгінде бейбіт күн кешіп отырған өзге ұлттар өз ұрпақтарына кезінде бақытын осы қазақ даласынан тапқандарын аманаттап отырады. Осыдан кейін біз де елдегі бірліктің сақталуы мен мемлекет дамына қазақтар ғана емес, өзге ұлт өкілдері де зор үлес қосып отыр деп сеніммен айта аламыз.
Н.Болатұлы
