https://turkystan.kz/article/264869-telefondagy-derekterdi-osirip-tastagan-atyrauda-24-zastagy-zigit-zogalyp-ketti
Атырауда26 шілдеде жоғалып кеткен 24 жастағы Жасұлан Үмбетов іздестіріліп жатыр, деп хабарлайды turkystan.kz сайты АқЖайыққа сілтеме жасап.
Ағасы Аслан Үмбетовтің сөзінше, Жасұлан үйінен кетер алдында телефонын қалдырып кеткен. Оның алдында бүкіл контактілерді жойып, құрылғы жадын тазартқан. Соңғы рет оны Алмагүл ықшам ауданындағы бейнебақылау камералары тіркеген. Бұл — оның соңғы белгілі болған жер.
«Осыдан кейін ол еш жерде көрінбеді. Көшеде де, қоғамдық орындарда да болмады. Біз полицияға хабарластық, таныс орындарды түгел араладық, достарымен және әріптестерімен сөйлестік. Ешқандай ақпарат жоқ. Полиция іздеп жатыр, бірақ әзірге нәтиже жоқ», — дейді ағасы.
Туған-туыстарының айтуынша, Жасұлан соңғы 9 ай бойы букмекерлік қосымшаларда бәс тіккен және күйзеліске түскен. Оның жоғалуын қарыздарымен байланысты болуы мүмкін деп болжап отыр.
«Біз жаман нәрсе боларынан қорқамыз. Бірақ оның тірі табыларына әлі үмітіміз бар», — дейді жақындары.
Атырау облысы полиция департаменті 2001 жылы туған азаматтың із-түссіз жоғалғаны туралы арыз 26 шілде күні сағат 21:00-де түскенін растады.
«Қазір іздестіру іс-шаралары жүргізіліп жатыр. Жас жігітті полиция қызметкерлері іздеп жатыр», — деді ведомстводан.
Туыстары Жасұлан Үмбетовтің қайда екені туралы қандай да болмасын ақпарат білетіндерді «102» телефоны арқылы хабарласуға шақырады.
Толық нұсқасына гиперсілтеме беруді ұмытпаңыз: https://turkystan.kz/article/264869-telefondagy-derekterdi-osirip-tastagan-atyrauda-24-zastagy-zigit-zogalyp-ketti
